ho chuka khel bahut ji se guzar jaane ka

ho chukā khel bahut jī se guzar jaane kā

aaj iqrār kareñ zaḳhm ke bhar jaane kā

ham bhī zinda the masīhā-nafasoñ ke hote

sach to ye hai ki vahī vaqt thā mar jaane kā

be-sarokār falak be-dar-o-dīvār zamīñ

sar meñ saudā hai mirī jaan kidhar jaane kā

ham yahāñ tak ḳhas-o-ḳhāshāk-e-badan ko le aa.e

aage ab koī bhī mausam ho bikhar jaane kā

koī dushvār nahīñ sheva-e-shorīda-sarī

haañ agar hai to zarā ḳhauf hai sar jaane kā

ab talak bazm meñ aanā hī thā ik kār-e-hunar

ham ne āġhāz kiyā kār-e-hunar jaane kā

ho chuka khel bahut ji se guzar jaane ka

aaj iqrar karen zaKHm ke bhar jaane ka

hum bhi zinda the masiha-nafason ke hote

sach to ye hai ki wahi waqt tha mar jaane ka

be-sarokar falak be-dar-o-diwar zamin

sar mein sauda hai meri jaan kidhar jaane ka

hum yahan tak KHas-o-KHashak-e-badan ko le aae

aage ab koi bhi mausam ho bikhar jaane ka

koi dushwar nahin shewa-e-shorida-sari

han agar hai to zara KHauf hai sar jaane ka

ab talak bazm mein aana hi tha ek kar-e-hunar

hum ne aaghaz kiya kar-e-hunar jaane ka