ho gai ishq mein badnam jawani apni

ho ga.ī ishq meñ badnām javānī apnī

ban ga.ī markaz-e-ālām javānī apnī

māzī-o-hāl haiñ mahrūm-e-sharāb-o-naġhma

haa.e afsurda-o-nākām javānī apnī

aah vo sub.h jo thī sub.h-e-bahār-e-hastī

hai usī sub.h kī ab shaam javānī apnī

ek tārīk fazā ek ghaTā sā māhaul

kisī muflis kā hai anjām javānī apnī

unhīñ rāhoñ meñ unhīñ mast-o-javāñ galiyoñ meñ

laḌkhaḌā.ī hai bahar-gām javānī apnī

ek vo din thā ki mai-ḳhānoñ pe ham bhārī the

aaj hai daur-e-tah-e-jām javānī apnī

iktifā kar ke khanakte hue roz-o-shab par

ban ga.ī ziist par ilzām javānī apnī

din huā dhuup chaḌhī Dhal ga.e saa.e 'altāf'

ab hai ik bujhtī huī shaam javānī apnī

ho gai ishq mein badnam jawani apni

ban gai markaz-e-alam jawani apni

mazi-o-haal hain mahrum-e-sharab-o-naghma

hae afsurda-o-nakaam jawani apni

aah wo subh jo thi subh-e-bahaar-e-hasti

hai usi subh ki ab sham jawani apni

ek tarik faza ek ghaTa sa mahaul

kisi muflis ka hai anjam jawani apni

unhin rahon mein unhin mast-o-jawan galiyon mein

laDkhaDai hai bahar-gam jawani apni

ek wo din tha ki mai-KHanon pe hum bhaari the

aaj hai daur-e-tah-e-jam jawani apni

iktifa kar ke khanakte hue roz-o-shab par

ban gai zist par ilzam jawani apni

din hua dhup chaDhi Dhal gae sae 'altaf'

ab hai ek bujhti hui sham jawani apni