ho ke bechain main bhaga kiya aahu ki tarah

ho ke bechain maiñ bhāgā kiyā aahū kī tarah

bas gayā thā mire andar koī ḳhushbū kī tarah

koī saaya na milā sāya-e-gesū kī tarah

saare jīvan kī thakan utrī hai jaadū kī tarah

merī āvāz tujhe chhū le bas itnī mohlat

tere kūche se guzar jā.ūñgā sādhū kī tarah

vo jo aa jaa.e to kyā hosh kā aalam hogā

jis ke aane kī ḳhabar phailī hai ḳhushbū kī tarah

zindagī pyaar vafā sab kā muqaddar yaksāñ

muskurāhaT kī tarah hai kabhī aañsū kī tarah

har taraf aag lagā aa.e ho phir pūchhte ho

kyuuñ chalī bād-e-sabā ab ke baras lū kī tarah

shā.erī terī ibādat ke sivā kuchh bhī nahīñ

kar rahā huuñ maiñ tapasyā kisī sādhū kī tarah

har alam saath rahā gard-e-safar kī mānind

har ḳhushī raah meñ mujh ko milī jugnū kī tarah

zindagī Thokareñ khātī hai bichhaḌ kar tujh se

terī pāzeb ke TuuTe hue ghuñghrū kī tarah

koī ishvar kahe us ko ki ḳhudā koī kahe

vo musalmāñ kī tarah hai na vo hindū kī tarah

apnī har saañs pe ehsāñ liye ham-dardoñ kā

zindagī jiitā huuñ is ahd meñ urdu kī tarah

ab ye ehsās kī ḳhūbī ho ki ḳhāmī ho 'nūr'

us kī nafrat kā dhuāñ bhī lagā ḳhushbū kī tarah

ho ke bechain main bhaga kiya aahu ki tarah

bas gaya tha mere andar koi KHushbu ki tarah

koi saya na mila saya-e-gesu ki tarah

sare jiwan ki thakan utri hai jadu ki tarah

meri aawaz tujhe chhu le bas itni mohlat

tere kuche se guzar jaunga sadhu ki tarah

wo jo aa jae to kya hosh ka aalam hoga

jis ke aane ki KHabar phaili hai KHushbu ki tarah

zindagi pyar wafa sab ka muqaddar yaksan

muskurahaT ki tarah hai kabhi aansu ki tarah

har taraf aag laga aae ho phir puchhte ho

kyun chali baad-e-saba ab ke baras lu ki tarah

shaeri teri ibaadat ke siwa kuchh bhi nahin

kar raha hun main tapasya kisi sadhu ki tarah

har alam sath raha gard-e-safar ki manind

har KHushi rah mein mujh ko mili jugnu ki tarah

zindagi Thokaren khati hai bichhaD kar tujh se

teri pazeb ke TuTe hue ghunghru ki tarah

koi ishwar kahe us ko ki KHuda koi kahe

wo musalman ki tarah hai na wo hindu ki tarah

apni har sans pe ehsan liye ham-dardon ka

zindagi jita hun is ahd mein urdu ki tarah

ab ye ehsas ki KHubi ho ki KHami ho 'nur'

us ki nafrat ka dhuan bhi laga KHushbu ki tarah