ho ke sar-ta-ba-qadam aalam-e-asrar chala

ho ke sar-tā-ba-qadam ālam-e-asrār chalā

jo chalā mai-kada-e-ishq se sarshār chalā

hamrah-e-husn ik amboh-e-ḳharīdār chalā

saath is jins ke bāzār kā bāzār chalā

na huā rāh-e-mohabbat meñ koī ohda-barā

jo subuk-dosh huā vo bhī girāñ-bār chalā

un kā jo haal ki pahle thā vahī haal rahā

tere ġham-kushtoñ se iqrār na inkār chalā

āsmāñ ho ki qayāmat ho ki ho tīr-e-qazā

chaal us fitna-e-daurāñ se har ik baar chalā

zauq-e-nazzāra usī kā hai jahāñ meñ tujh ko

dekh kar bhī jo liye hasrat-e-dīdār chalā

husn-e-kāfir se kisī kī na ga.ī pesh 'firāq'

shikva yāroñ kā na shukrāna-e-aġhyār chalā

ho ke sar-ta-ba-qadam aalam-e-asrar chala

jo chala mai-kada-e-ishq se sarshaar chala

hamrah-e-husn ek amboh-e-KHaridar chala

sath is jins ke bazar ka bazar chala

na hua rah-e-mohabbat mein koi ohda-bara

jo subuk-dosh hua wo bhi giran-bar chala

un ka jo haal ki pahle tha wahi haal raha

tere gham-kushton se iqrar na inkar chala

aasman ho ki qayamat ho ki ho tir-e-qaza

chaal us fitna-e-dauran se har ek bar chala

zauq-e-nazzara usi ka hai jahan mein tujh ko

dekh kar bhi jo liye hasrat-e-didar chala

husn-e-kafir se kisi ki na gai pesh 'firaq'

shikwa yaron ka na shukrana-e-aghyar chala