ho kyun na tere kaam mein hairan tamasha

ho kyuuñ na tire kaam meñ hairān tamāshā

yā-rab tirī qudrat meñ hai har aan tamāshā

le arsh se tā-farsh na.e rañg na.e Dhañg

har shakl ajā.ib hai har ik shaan tamāshā

aflāk pe tāroñ kī jhalaktī hai tilismāt

aur rū-e-zamīñ par gul-o-raihān tamāshā

jinnāt parī dev malak huur bhī nādir

insān ajūba hai to haivān tamāshā

jab husn ke jaatī hai muraqqa.a pe nazar aah

kyā kyā nazar aatā hai har ik aan tamāshā

choTī kī guñdhāvaT kahīñ dikhlātī hai lahreñ

rakhtī hai kahīñ zulf-e-pareshān tamāshā

gar ishq ke kūche meñ guzar kiije to vaañ bhī

har vaqt na.ī sair hai har aan tamāshā

muñh zard badan ḳhushk jigar chaak alamnāk

ġhul shor tapish nāla-o-afġhān tamāshā

ham past nigāhoñ kī nazar meñ to 'nazīr' aah

sab arz-o-samā kī hai gulistān tamāshā

ho kyun na tere kaam mein hairan tamasha

ya-rab teri qudrat mein hai har aan tamasha

le arsh se ta-farsh nae rang nae Dhang

har shakl ajaib hai har ek shan tamasha

aflak pe taron ki jhalakti hai tilismat

aur ru-e-zamin par gul-o-raihan tamasha

jinnat pari dew malak hur bhi nadir

insan ajuba hai to haiwan tamasha

jab husn ke jati hai muraqqa pe nazar aah

kya kya nazar aata hai har ek aan tamasha

choTi ki gundhawaT kahin dikhlati hai lahren

rakhti hai kahin zulf-e-pareshan tamasha

gar ishq ke kuche mein guzar kije to wan bhi

har waqt nai sair hai har aan tamasha

munh zard badan KHushk jigar chaak alamnak

ghul shor tapish nala-o-afghan tamasha

hum past nigahon ki nazar mein to 'nazir' aah

sab arz-o-sama ki hai gulistan tamasha