ho zamana udhar idhar hum tum

ho zamāna udhar idhar ham tum

ek-dūje ke dil-jigar ham tum

dil kī manzil ke ham-safar ham tum

ho ke duniyā se be-ḳhabar ham tum

āsmāñ se jo dekhe chāñd kabhī

chāñd ko aa.e bas nazar ham tum

vasl kī raat muḳhtasar sī lagī

rahe bātoñ meñ raat bhar ham tum

aa.e koī shikan na chehre par

rāste meñ mileñ agar ham tum

vaqtī har shai hai is jahāñ meñ par

ishq ke dahr meñ amar ham tum

ho zamana udhar idhar hum tum

ek-duje ke dil-jigar hum tum

dil ki manzil ke ham-safar hum tum

ho ke duniya se be-KHabar hum tum

aasman se jo dekhe chand kabhi

chand ko aae bas nazar hum tum

wasl ki raat muKHtasar si lagi

rahe baaton mein raat bhar hum tum

aae koi shikan na chehre par

raste mein milen agar hum tum

waqti har shai hai is jahan mein par

ishq ke dahr mein amar hum tum