ab ki holi mein raha be-kar rang

ab kī holī meñ rahā be-kār rang

aur hī laayā firāq-e-yār rang

surḳh-rū kar de sharāb aa.ī bahār

hai ḳhizāñ se zard ai ḳhummār rang

hoñT uude sabz ḳhat āñkheñ siyāh

chehre kā surḳh-o-safed ai yaar rang

ham ko saare gulshan-e-āfāq meñ

bas pasand aa.e yahī do-chār rang

ġhair se khelī hai holī yaar ne

Daale mujh par dīda-e-ḳhūñ-bār rang

kis kī holī jashn-e-nau-rozī hai aaj

surḳh mai se sāqiyā dastār rang

hijr-e-jānāñ meñ Thahartā hī nahīñ

kyā hī mere muñh se hai bezār rang

kyā hai girgiT āsmāñ ke sāmne

badle ik ik dam meñ sau sau baar rang

aatī hai o qais lailā dasht meñ

ḳhūn-e-pā se jild ab pur-ḳhār rang

dhuup hai par mere roz-e-hijr kā

hai ba-rañg-e-sāya-e-dīvār rang

ho gayā kyuuñ zard 'nāsiḳh' kyā kahūñ

hai zamāne kā ajab ai yaar rang

ab ki holi mein raha be-kar rang

aur hi laya firaq-e-yar rang

surKH-ru kar de sharab aai bahaar

hai KHizan se zard ai KHummar rang

honT ude sabz KHat aankhen siyah

chehre ka surKH-o-safed ai yar rang

hum ko sare gulshan-e-afaq mein

bas pasand aae yahi do-chaar rang

ghair se kheli hai holi yar ne

Dale mujh par dida-e-KHun-bar rang

kis ki holi jashn-e-nau-rozi hai aaj

surKH mai se saqiya dastar rang

hijr-e-jaanan mein Thaharta hi nahin

kya hi mere munh se hai bezar rang

kya hai girgiT aasman ke samne

badle ek ek dam mein sau sau bar rang

aati hai o qais laila dasht mein

KHun-e-pa se jild ab pur-KHar rang

dhup hai par mere roz-e-hijr ka

hai ba-rang-e-saya-e-diwar rang

ho gaya kyun zard 'nasiKH' kya kahun

hai zamane ka ajab ai yar rang