hon jo sare dast o pa hain KHun main nahlae hue

hoñ jo saare dast o pā haiñ ḳhuuñ maiñ nahlā.e hue

ham bhī haiñ ai dil bahārāñ kī qasam khaa.e hue

ḳhabt hai ai ham-nashīñ aql-e-harīfān-e-bahār

hai ḳhizāñ in kī inheñ ā.īna dikhlā.e hue

kyā hai zikr-e-ātish-o-āhan ki gaddārān-e-gul

mārte haiñ haath añgāroñ pe ghabrā.e hue

zindagī kī qadr sīkhī shukriya teġh-e-sitam

haañ hameñ the kal talak jiine se uktā.e hue

sair-e-sāhil kar chuke ai mauj-e-sāhil sar na maar

tujh se kyā bahleñge tūfānoñ ke bahlā.e hue

hai yahī ik kārobār-e-naġhma-o-mastī ki ham

yā zamīñ par yā sar-e-aflāk haiñ chhā.e hue

saaz uThāyā jab to garmāte phire zarroñ ke dil

jaam haath aayā to mahr o mah ke ham-sā.e hue

dasht o dar banñe ko haiñ 'majrūh' maidān-e-bahār

aa rahī hai fasl-e-gul parcham ko lahrā.e hue

hon jo sare dast o pa hain KHun main nahlae hue

hum bhi hain ai dil bahaaran ki qasam khae hue

KHabt hai ai ham-nashin aql-e-harifan-e-bahaar

hai KHizan in ki inhen aaina dikhlae hue

kya hai zikr-e-atish-o-ahan ki gaddaran-e-gul

marte hain hath angaron pe ghabrae hue

zindagi ki qadr sikhi shukriya tegh-e-sitam

han hamein the kal talak jine se uktae hue

sair-e-sahil kar chuke ai mauj-e-sahil sar na mar

tujh se kya bahlenge tufanon ke bahlae hue

hai yahi ek karobar-e-naghma-o-masti ki hum

ya zamin par ya sar-e-aflak hain chhae hue

saz uThaya jab to garmate phire zarron ke dil

jam hath aaya to mahr o mah ke ham-sae hue

dasht o dar banne ko hain 'majruh' maidan-e-bahaar

aa rahi hai fasl-e-gul parcham ko lahrae hue