hona hi kya zarur the ye do-jahan hain kyun

honā hī kyā zarūr the ye do-jahāñ haiñ kyuuñ

allāh ik fareb meñ kaun-o-makāñ haiñ kyuuñ

sunte haiñ ek dard to uThtā hai bār-bār

us kī ḳhabar nahīñ hai ki aañsū ravāñ haiñ kyuuñ

in be-niyāziyoñ meñ bhī shān-e-niyāz hai

sajde nahīñ pasand to phir āstāñ haiñ kyuuñ

jis gulsitāñ meñ roz taḌaptī haiñ bijliyāñ

yārab usī chaman meñ ye phir āshiyāñ haiñ kyuuñ

is kā hameñ malāl hai ham kyuuñ badal ga.e

is kā nahīñ malāl ki vo bad-gumāñ haiñ kyuuñ

jab dil nahīñ rahā to tamannā kā kaam kyā

jab kārvāñ nahīñ to pas-e-kārvāñ haiñ kyuuñ

'bahzād' un ke hijr meñ ghabrā rahā hai dil

ab kyā kaheñ kisī se ki bas ḳhānumāñ haiñ kyuuñ

hona hi kya zarur the ye do-jahan hain kyun

allah ek fareb mein kaun-o-makan hain kyun

sunte hain ek dard to uThta hai bar-bar

us ki KHabar nahin hai ki aansu rawan hain kyun

in be-niyaziyon mein bhi shan-e-niyaz hai

sajde nahin pasand to phir aastan hain kyun

jis gulsitan mein roz taDapti hain bijliyan

yarab usi chaman mein ye phir aashiyan hain kyun

is ka hamein malal hai hum kyun badal gae

is ka nahin malal ki wo bad-guman hain kyun

jab dil nahin raha to tamanna ka kaam kya

jab karwan nahin to pas-e-karwan hain kyun

'bahzad' un ke hijr mein ghabra raha hai dil

ab kya kahen kisi se ki bas KHanuman hain kyun