honTon pe uske jumbish-e-inkar bhi nahin

hoñToñ pe us ke jumbish-e-inkār bhī nahīñ

āñkhoñ meñ koī shoḳhī-e-iqrār bhī nahīñ

bastī meñ koī mūnis-o-ġham-ḳhvār bhī nahīñ

'ġhālib' kā haa.e koī taraf-dār bhī nahīñ

kashtī burī tarah hai bhañvar meñ phañsī huī

lekin hamāre haath meñ patvār bhī nahīñ

un ko sazā.eñ dī haiñ zamāne ne bārhā

mulzim bhī jo nahīñ haiñ gunahgār bhī nahīñ

tohfa 'ajab diyā hai chaman ko bahār ne

phūloñ kā zikr kyā hai koī ḳhaar bhī nahīñ

shāyad ta'alluqāt meñ ab injimād hai

pahlī sī baat baat pe takrār bhī nahīñ

show-pīs to banā diyā hālāt ne 'asad'

koī magar hamārā ḳharīdār bhī nahīñ

honTon pe us ke jumbish-e-inkar bhi nahin

aankhon mein koi shoKHi-e-iqrar bhi nahin

basti mein koi munis-o-gham-KHwar bhi nahin

'ghaalib' ka hae koi taraf-dar bhi nahin

kashti buri tarah hai bhanwar mein phansi hui

lekin hamare hath mein patwar bhi nahin

un ko sazaen di hain zamane ne barha

mulzim bhi jo nahin hain gunahgar bhi nahin

tohfa 'ajab diya hai chaman ko bahaar ne

phulon ka zikr kya hai koi KHar bhi nahin

shayad ta'alluqat mein ab injimad hai

pahli si baat baat pe takrar bhi nahin

show-pis to bana diya haalat ne 'asad'

koi magar hamara KHaridar bhi nahin