hosh mein aa kar mujhe ghaflat ka andaza hua

hosh meñ aa kar mujhe ġhaflat kā andāza huā

matlabī is daur kī chāhat kā andāza huā

mushkiloñ ko rauñd kar jab maiñ baḌhā manzil kī samt

ham-safar ko tab mirī himmat kā andāza huā

jab amīr-e-shahr ne mujh ko biThāyā apne paas

ahl-e-mahfil ko mirī 'izzat kā andāza huā

jo mire dil meñ basā thā jab huā maiñ us se duur

pyaar ke ehsās aur ulfat kā andāza huā

be-ḳhabar thā apnī hālat se maiñ tere hijr meñ

aa.ine ko dekh kar hālat kā andāza huā

vo parī-paikar nazar ke sāmne thā be-naqāb

raat apne ḳhvāb kī qīmat kā andāza huā

tishna-lab lauTā maiñ jab dariyā pe aa kar ai 'qamar'

tab kisī kī pyaas kī shiddat kā andāza huā

hosh mein aa kar mujhe ghaflat ka andaza hua

matlabi is daur ki chahat ka andaza hua

mushkilon ko raund kar jab main baDha manzil ki samt

ham-safar ko tab meri himmat ka andaza hua

jab amir-e-shahr ne mujh ko biThaya apne pas

ahl-e-mahfil ko meri 'izzat ka andaza hua

jo mere dil mein basa tha jab hua main us se dur

pyar ke ehsas aur ulfat ka andaza hua

be-KHabar tha apni haalat se main tere hijr mein

aaine ko dekh kar haalat ka andaza hua

wo pari-paikar nazar ke samne tha be-naqab

raat apne KHwab ki qimat ka andaza hua

tishna-lab lauTa main jab dariya pe aa kar ai 'qamar'

tab kisi ki pyas ki shiddat ka andaza hua