hosh mein aaen to kya hosh mein aae na bane

hosh meñ aa.eñ to kyā hosh meñ aa.e na bane

be-ḳhudī apnī vo parda ki uThā.e na bane

chāk-e-dil chāk-e-jigar chāk-e-garebāñ mat dekh

mujh se yuuñ luT ke tire sāmne aa.e na bane

nā-umīdī kā sukūñ bhī mirī qismat meñ nahīñ

sham-e-umīd bujhā.ūñ to bujhā.e na bane

ham to nākām palaT aa.eñ pa ai jān-e-hayāt

nā-murādāna tirī bazm se aa.e na bane

haa.e vo lauh-e-jabīñ aur vo tahrīr-e-vafā

kis tarah us ko bhulā.ūñ ki bhulā.e na bane

apnī nākām mohabbat pe pashemāñ huuñ 'payām'

ziist se aañkh milā.ūñ to milā.e na bane

hosh mein aaen to kya hosh mein aae na bane

be-KHudi apni wo parda ki uThae na bane

chaak-e-dil chaak-e-jigar chaak-e-gareban mat dekh

mujh se yun luT ke tere samne aae na bane

na-umidi ka sukun bhi meri qismat mein nahin

sham-e-umid bujhaun to bujhae na bane

hum to nakaam palaT aaen pa ai jaan-e-hayat

na-muradana teri bazm se aae na bane

hae wo lauh-e-jabin aur wo tahrir-e-wafa

kis tarah us ko bhulaun ki bhulae na bane

apni nakaam mohabbat pe pasheman hun 'payam'

zist se aankh milaun to milae na bane