hosh-o-hawas jab se hamare chale gae

hosh-o-havās jab se hamāre chale ga.e

jo yār-e-ġham-gusār the saare chale ga.e

ai chārāgar vo dekh tire dar se nā-murād

bīmār-e-ishq yaas ke maare chale ga.e

ehsān nāḳhudā kā uThānā thā nāgavār

us paar ham ḳhudā ke sahāre chale ga.e

is be-ḳhudī kī ḳhair tirī justujū meñ ham

apnā hī naam aap pukāre chale ga.e

dil meñ liye shikāyat-e-be-mehrī-e-jahāñ

jaur-o-jafā ke dard ke maare chale ga.e

hosh-o-havās tāb-o-tavāñ zauq-e-bandagī

ham se ye zindagī ke sahāre chale ga.e

duniyā se jab ravāna hue ham gunāhgār

sar muñh chhupā.e sharm ke maare chale ga.e

'āzam' palaT ke aa.eñ vo mumkin kahāñ bhalā

āsūdgī meñ din jo guzāre chale ga.e

hosh-o-hawas jab se hamare chale gae

jo yar-e-gham-gusar the sare chale gae

ai chaaragar wo dekh tere dar se na-murad

bimar-e-ishq yas ke mare chale gae

ehsan naKHuda ka uThana tha nagawar

us par hum KHuda ke sahaare chale gae

is be-KHudi ki KHair teri justuju mein hum

apna hi nam aap pukare chale gae

dil mein liye shikayat-e-be-mehri-e-jahan

jaur-o-jafa ke dard ke mare chale gae

hosh-o-hawas tab-o-tawan zauq-e-bandagi

hum se ye zindagi ke sahaare chale gae

duniya se jab rawana hue hum gunahgar

sar munh chhupae sharm ke mare chale gae

'azam' palaT ke aaen wo mumkin kahan bhala

aasudgi mein din jo guzare chale gae