hosh-o-KHirad se dur hun sud-o-ziyan se dur

hosh-o-ḳhirad se duur huuñ sūd-o-ziyāñ se duur

dīvāna huuñ quyūd-e-rusūm-e-jahāñ se duur

hadd-e-nazar se duur zamān-o-makāñ se duur

manzil hai mere ishq kī fahm-o-gumāñ se duur

rañgīnī-e-jamāl se sahrā bhī hai chaman

baiThā huuñ gulsitāñ meñ magar gulsitāñ se duur

ye be-ḳhudī-e-shauq kā aalam to dekhiye

sajde to kar rahā huuñ magar āstāñ se duur

dil bhī vahī hai maiñ bhī vahī dard bhī vahī

lekin ye kyā ki lazzat-e-soz-e-nihāñ se duur

shāyad usī kā naam hai nākāmī-e-murād

manzil se huuñ qarīb magar kārvāñ se duur

afsāna-e-hayāt ko samjho to ai 'sabā'

har harf dāstāñ hai magar dāstāñ se duur

hosh-o-KHirad se dur hun sud-o-ziyan se dur

diwana hun quyud-e-rusum-e-jahan se dur

hadd-e-nazar se dur zaman-o-makan se dur

manzil hai mere ishq ki fahm-o-guman se dur

rangini-e-jamal se sahra bhi hai chaman

baiTha hun gulsitan mein magar gulsitan se dur

ye be-KHudi-e-shauq ka aalam to dekhiye

sajde to kar raha hun magar aastan se dur

dil bhi wahi hai main bhi wahi dard bhi wahi

lekin ye kya ki lazzat-e-soz-e-nihan se dur

shayad usi ka nam hai nakaami-e-murad

manzil se hun qarib magar karwan se dur

afsana-e-hayat ko samjho to ai 'saba'

har harf dastan hai magar dastan se dur