hosh saqi ko na KHum ka hai na paimane ka

hosh saaqī ko na ḳhum kā hai na paimāne kā

is tarah haal ye abtar huā maiḳhāne kā

shiddat-e-ġham se nikal hī paḌe āḳhir aañsū

sham.a se soz na dekhā gayā parvāne kā

jāñ-ba-haq ho gayā hotā ye kabhī kā bīmār

gar yaqīñ hotā na us shoḳh ke aa jaane kā

dair bantā hai haram aur haram dair kabhī

ka.aba kahte haiñ jise naam hai but-ḳhāne kā

tauq-o-zanjīr meñ bāñdhe na bañdhegā hargiz

baḌh gayā aur junūñ gar tire dīvāne kā

vo pas-e-marg ab aa.e haiñ ayādat ko mirī

jabki duniyā meñ hai shohrā mire mar jaane kā

kis qadar 'shauq' hasīnoñ ke khiñche haiñ naqshe

dil ke har zarra meñ aalam hai parī-ḳhāne kā

hosh saqi ko na KHum ka hai na paimane ka

is tarah haal ye abtar hua maiKHane ka

shiddat-e-gham se nikal hi paDe aaKHir aansu

shama se soz na dekha gaya parwane ka

jaan-ba-haq ho gaya hota ye kabhi ka bimar

gar yaqin hota na us shoKH ke aa jaane ka

dair banta hai haram aur haram dair kabhi

kaba kahte hain jise nam hai but-KHane ka

tauq-o-zanjir mein bandhe na bandhega hargiz

baDh gaya aur junun gar tere diwane ka

wo pas-e-marg ab aae hain ayaadat ko meri

jabki duniya mein hai shohra mere mar jaane ka

kis qadar 'shauq' hasinon ke khinche hain naqshe

dil ke har zarra mein aalam hai pari-KHane ka