hota hai mehrban kahan par KHuda-e-ishq

hotā hai mehrbān kahāñ par ḳhudā-e-ishq

lagtī hai phir bhī shahr meñ khul ke sadā-e-ishq

nukta yahī azal se paḌhāyā gayā hameñ

havvā barā.e-husn hai aadam barā.e-ishq

duniyā hamāre haath meñ hai geñd kī tarah

ham kar rahe haiñ zindagī jab se barā.e ishq

baiThe haiñ misl-e-yār hue ḳhud ke rū-ba-rū

miltī nahīñ har ek ko aisī atā-e-ishq

detā huuñ saare shahr meñ bas ek hī sadā

darvesh degā ḳhair meñ sab ko dua.a-e-ishq

muusā ko samt-e-tūr jo ik mauj le ga.ī

vo intihā-e-shauq thī yā ibtidā-e-ishq

duniyā kī justujū to huī ḳhatm kab kī dost

murshid hamārā ishq hai ham haiñ gadā-e-ishq

hota hai mehrban kahan par KHuda-e-ishq

lagti hai phir bhi shahr mein khul ke sada-e-ishq

nukta yahi azal se paDhaya gaya hamein

hawwa barae-husn hai aadam barae-ishq

duniya hamare hath mein hai gend ki tarah

hum kar rahe hain zindagi jab se barae ishq

baiThe hain misl-e-yar hue KHud ke ru-ba-ru

milti nahin har ek ko aisi ata-e-ishq

deta hun sare shahr mein bas ek hi sada

darwesh dega KHair mein sab ko dua-e-ishq

musa ko samt-e-tur jo ek mauj le gai

wo intiha-e-shauq thi ya ibtida-e-ishq

duniya ki justuju to hui KHatm kab ki dost

murshid hamara ishq hai hum hain gada-e-ishq