hota hai mere haal ka charcha mere aage

hotā hai mire haal kā charchā mire aage

bantā hai mirā roz tamāshā mire aage

afsos mirī aañkh meñ aañsū bhī nahīñ the

dam toḌ rahā thā koī pyāsā mire aage

itnā bhī ujāle na kareñ merā ta'āqub

aa jaa.e mire jism kā saaya mire aage

ye daur-e-guzishta meñ thā raftār kā 'ālam

manzil mire pīchhe rahī rasta mire aage

is vaqt maiñ ḳhud laash huuñ ḳhud nauha-sarā huuñ

rakkhā hai mirā apnā janāza mire aage

nākāmī-e-qismat kī shurū'āt huī hai

aatā hai abhī dekhiye kyā kyā mire aage

hota hai mere haal ka charcha mere aage

banta hai mera roz tamasha mere aage

afsos meri aankh mein aansu bhi nahin the

dam toD raha tha koi pyasa mere aage

itna bhi ujale na karen mera ta'aqub

aa jae mere jism ka saya mere aage

ye daur-e-guzishta mein tha raftar ka 'alam

manzil mere pichhe rahi rasta mere aage

is waqt main KHud lash hun KHud nauha-sara hun

rakkha hai mera apna janaza mere aage

nakaami-e-qismat ki shuru'at hui hai

aata hai abhi dekhiye kya kya mere aage