hoti hai garche kahne se yaro parai baat

hotī hai garche kahne se yaaro parā.ī baat

par ham se to thañbe na kabhū muñh par aa.ī baat

jaane na tujh ko jo ye tasanño tū us se kar

tis par bhī to chhupī nahīñ rahtī banā.ī baat

lag kar tadarrau rah ga.e dīvār-e-bāġh se

raftār kī jo terī sabā ne chalā.ī baat

kahte the us se miliye to kyā kyā na kahiye lek

vo aa gayā to sāmne us ke na aa.ī baat

ab to hue haiñ ham bhī tire Dhab se āshnā

vaañ tū ne kuchh kahā ki idhar ham ne paa.ī baat

bulbul ke bolne meñ sab andāz haiñ mire

poshīda kab rahe hai kisū kī uḌaa.ī baat

bhaḌkā thā raat dekh ke vo sho.ala-ḳhū mujhe

kuchh rū-siyah raqīb ne shāyad lagā.ī baat

aalam siyāh-ḳhāna hai kis kā ki roz-o-shab

ye shor hai ki detī nahīñ kuchh sunā.ī baat

ik din kahā thā ye ki ḳhamoshī meñ hai vaqār

so mujh se hī suḳhan nahīñ maiñ jo batā.ī baat

ab mujh za.īf-o-zār ko mat kuchh kahā karo

jaatī nahīñ hai mujh se kisū kī uThā.ī baat

ḳhat likhte likhte 'mīr' ne daftar kiye ravāñ

ifrāt-e-ishtiyāq ne āḳhir baḌhā.ī baat

hoti hai garche kahne se yaro parai baat

par hum se to thanbe na kabhu munh par aai baat

jaane na tujh ko jo ye tasanno tu us se kar

tis par bhi to chhupi nahin rahti banai baat

lag kar tadarrau rah gae diwar-e-bagh se

raftar ki jo teri saba ne chalai baat

kahte the us se miliye to kya kya na kahiye lek

wo aa gaya to samne us ke na aai baat

ab to hue hain hum bhi tere Dhab se aashna

wan tu ne kuchh kaha ki idhar hum ne pai baat

bulbul ke bolne mein sab andaz hain mere

poshida kab rahe hai kisu ki uDai baat

bhaDka tha raat dekh ke wo shoala-KHu mujhe

kuchh ru-siyah raqib ne shayad lagai baat

aalam siyah-KHana hai kis ka ki roz-o-shab

ye shor hai ki deti nahin kuchh sunai baat

ek din kaha tha ye ki KHamoshi mein hai waqar

so mujh se hi suKHan nahin main jo batai baat

ab mujh zaif-o-zar ko mat kuchh kaha karo

jati nahin hai mujh se kisu ki uThai baat

KHat likhte likhte 'mir' ne daftar kiye rawan

ifraat-e-ishtiyaq ne aaKHir baDhai baat