hoti hai haar jit pinhan baat baat mein

hotī hai haar jiit pinhāñ baat baat meñ

chaupaḌ bichhī hai anjuman-e-kā.enāt meñ

rakh fikr-e-jism āryatī kā.enāt meñ

chorī na jaa.eñ maañg ke kapḌe barāt meñ

pyāse mirī lahū ke haiñ sab kā.enāt meñ

kashti-e-umr chaltī hai āb-e-furāt meñ

be-aql ho ke aa ga.e hastī kī ghaat meñ

dīvāne ban ke phañs ga.e qaid-e-hayāt meñ

saaqī se kah do sabza-e-tar meñ bahā sharāb

Tāñke kadū kī bel qabā-e-nabāt meñ

kī talḳh guftugū lab-e-jāñ-baḳhsh se mudām

afyūn gholī aap ne āb-e-hayāt meñ

qaa.em mizājiyoñ meñ bhī ġhaflat muhīt hai

hai ḳhvāb-e-marg maḳhmal-e-rañg-e-sabāt meñ

hoñToñ kā ishq thā ye rahe aabrū kī baat

murde ko ġhusl dījiye āb-e-hayāt meñ

pahuñchā jo tere kūche meñ ḳhud-rafta ho gayā

jaatā rahā maiñ aap se rāh-e-najāt meñ

malte haiñ ḳhūb-rū tire ḳheme se chhātiyāñ

añgiyā kī Doriyāñ haiñ muqarrar qanāt meñ

hastī meñ tark kījiye zulfoñ ke ishq ko

zanjīreñ dohrī toḌiye qaid-e-hayāt meñ

mūsā-o-ḳhizr ne tire baTne ke vāste

gholā hai barq-e-tūr ko āb-e-hayāt meñ

ġhārat kiyā aḳhīr javānī meñ dahr ko

duniyā tamām luuT lī thoḌī sī raat meñ

juz dāġh-e-zindagī meñ nahīñ aur kuchh surūr

afyūn kab hai lāla-e-rañg-e-sabāt meñ

muddat se Dher jāda-e-bāk-e-najaf meñ hai

takiya hai is faqīr kā rāh-e-najāt meñ

shādī huī jo raat ko khele vo ganjifa

raushan kiyā ġhulām ne ikkā barāt meñ

kūche meñ rakh ke āshiq-e-muztar kī haDDiyāñ

machhlī ke kāñTe bo diye rāh-e-najāt meñ

dil kī safā ho jāma-e-hastī meñ jalva-gar

jeb-e-sahar ugā.ūñ qabā-e-hayāt meñ

sāvan ke badle gā.iye 'hāfiz' ke sher-e-tar

jhūlā zarūr Dāliye shāḳh-e-nabāt meñ

hastī kī qaid se dil-e-betāb chhup gayā

machhlī na Thahrī bāzū-e-sham-e-hayāt meñ

murde jilā.e saikḌoñ Thukrā kar ai sanam

dast-e-masīh kā hai asar terī laat meñ

shīrīñ-adā.iyāñ bhī hoñ raftār-e-nāz bhī

kāfūr-e-sub.h-e-hashr ho qand-o-nabāt meñ

hoñToñ kī mastī duur kī tū ne khaTā.ī se

lemuu. kī chāshnī hai tirī mīThī baat meñ

andhā banā.eñge vo rulā kar itaab se

rahte haiñ roz aañkh churāne kī ghaat meñ

maut aa.e mujh ko hijr meñ ahmad kī ai 'munīr'

vallāh kuchh mazā nahīñ aisī hayāt meñ

hoti hai haar jit pinhan baat baat mein

chaupaD bichhi hai anjuman-e-kaenat mein

rakh fikr-e-jism aaryati kaenat mein

chori na jaen mang ke kapDe baraat mein

pyase meri lahu ke hain sab kaenat mein

kashti-e-umr chalti hai aab-e-furaat mein

be-aql ho ke aa gae hasti ki ghat mein

diwane ban ke phans gae qaid-e-hayat mein

saqi se kah do sabza-e-tar mein baha sharab

Tanke kadu ki bel qaba-e-nabaat mein

ki talKH guftugu lab-e-jaan-baKHsh se mudam

afyun gholi aap ne aab-e-hayat mein

qaem mizajiyon mein bhi ghaflat muhit hai

hai KHwab-e-marg maKHmal-e-rang-e-sabaat mein

honTon ka ishq tha ye rahe aabru ki baat

murde ko ghusl dijiye aab-e-hayat mein

pahuncha jo tere kuche mein KHud-rafta ho gaya

jata raha main aap se rah-e-najat mein

malte hain KHub-ru tere KHeme se chhatiyan

angiya ki Doriyan hain muqarrar qanat mein

hasti mein tark kijiye zulfon ke ishq ko

zanjiren dohri toDiye qaid-e-hayat mein

musa-o-KHizr ne tere baTne ke waste

ghola hai barq-e-tur ko aab-e-hayat mein

ghaarat kiya aKHir jawani mein dahr ko

duniya tamam luT li thoDi si raat mein

juz dagh-e-zindagi mein nahin aur kuchh surur

afyun kab hai lala-e-rang-e-sabaat mein

muddat se Dher jada-e-bak-e-najaf mein hai

takiya hai is faqir ka rah-e-najat mein

shadi hui jo raat ko khele wo ganjifa

raushan kiya ghulam ne ikka baraat mein

kuche mein rakh ke aashiq-e-muztar ki haDDiyan

machhli ke kanTe bo diye rah-e-najat mein

dil ki safa ho jama-e-hasti mein jalwa-gar

jeb-e-sahar ugaun qaba-e-hayat mein

sawan ke badle gaiye 'hafiz' ke sher-e-tar

jhula zarur Daliye shaKH-e-nabaat mein

hasti ki qaid se dil-e-betab chhup gaya

machhli na Thahri bazu-e-sham-e-hayat mein

murde jilae saikDon Thukra kar ai sanam

dast-e-masih ka hai asar teri lat mein

shirin-adaiyan bhi hon raftar-e-naz bhi

kafur-e-subh-e-hashr ho qand-o-nabaat mein

honTon ki masti dur ki tu ne khaTai se

lemu ki chashni hai teri miThi baat mein

andha banaenge wo rula kar itab se

rahte hain roz aankh churane ki ghat mein

maut aae mujh ko hijr mein ahmad ki ai 'munir'

wallah kuchh maza nahin aisi hayat mein