hoti hai mujh pe unki inayat kabhi kabhi

hotī hai mujh pe un kī ināyat kabhī kabhī

tāsīr jab dikhātī hai ulfat kabhī kabhī

hāsil huī hai nuur se zulmat kabhī kabhī

hai un ke shukriye meñ shikāyat kabhī kabhī

ai raushnī-e-tab.a tū bar man balā shudī

zillat-nasīb hotī hai shohrat kabhī kabhī

ġhairoñ se iltifāt to apnoñ se be-ruḳhī

be-jā rahī hai un kī muravvat kabhī kabhī

ranj-o-ḳhushī kā dahr ne dekhā hai imtizāj

hotī hai qahqahoñ se bhī riqqat kabhī kabhī

sach hai mizāj-e-yār talavvun-pasand hai

ulfat kabhī kabhī hai adāvat kabhī kabhī

'sāqib' kā hāl-e-zār vo sunte hī aa.e haiñ

muzhda hai vasl kā shab-e-furqat kabhī kabhī

hoti hai mujh pe un ki inayat kabhi kabhi

tasir jab dikhati hai ulfat kabhi kabhi

hasil hui hai nur se zulmat kabhi kabhi

hai un ke shukriye mein shikayat kabhi kabhi

ai raushni-e-taba tu bar man bala shudi

zillat-nasib hoti hai shohrat kabhi kabhi

ghairon se iltifat to apnon se be-ruKHi

be-ja rahi hai un ki murawwat kabhi kabhi

ranj-o-KHushi ka dahr ne dekha hai imtizaj

hoti hai qahqahon se bhi riqqat kabhi kabhi

sach hai mizaj-e-yar talawwun-pasand hai

ulfat kabhi kabhi hai adawat kabhi kabhi

'saqib' ka haal-e-zar wo sunte hi aae hain

muzhda hai wasl ka shab-e-furqat kabhi kabhi