hua dil ka haal abtar tujhe yaad karte karte

huā dil kā haal abtar tujhe yaad karte karte

mirī jaañ nikal na jaa.e kahīñ aah bharte bharte

mirī ārzū-e-dil ko na.ī zindagī milī hai

ki abhī abhī bache haiñ mire ḳhvāb marte marte

tujhe bhūlne kī ḳhātir bhī hai ek umr lāzim

kaTī ek umr merī tujhe yaad karte karte

huī maut jab muqābil mujhe tum hī yaad aa.e

rahe tum hī jān-e-armāñ mirī jaan marte marte

jo kisī ne mujh se pūchhī mirī āḳhirī tamannā

tirā naam hī to aayā mire lab pe Darte Darte

ye thā kis ko ilm yaaro ye bhalā kise ḳhabar thī

koī jī uThegā ik din tire ġham meñ marte marte

isī ḳhauf se ki tujh ko kahīñ bhuul hī na jā.ūñ

tujhe yaad kar rahī huuñ use yaad karte karte

hua dil ka haal abtar tujhe yaad karte karte

meri jaan nikal na jae kahin aah bharte bharte

meri aarzu-e-dil ko nai zindagi mili hai

ki abhi abhi bache hain mere KHwab marte marte

tujhe bhulne ki KHatir bhi hai ek umr lazim

kaTi ek umr meri tujhe yaad karte karte

hui maut jab muqabil mujhe tum hi yaad aae

rahe tum hi jaan-e-arman meri jaan marte marte

jo kisi ne mujh se puchhi meri aaKHiri tamanna

tera nam hi to aaya mere lab pe Darte Darte

ye tha kis ko ilm yaro ye bhala kise KHabar thi

koi ji uThega ek din tere gham mein marte marte

isi KHauf se ki tujh ko kahin bhul hi na jaun

tujhe yaad kar rahi hun use yaad karte karte