hua hai ahl-e-sahil par asar kya

huā hai ahl-e-sāhil par asar kyā

tujhe ai Dūbne vaale ḳhabar kyā

vahī hai chashm-e-nargis kā tahayyur

nahīñ gulshan meñ koī dīda-var kyā

safīna kyuuñ tah-e-girdāb aayā

talātum-ḳhez maujoñ ko ḳhabar kyā

nigāh-e-lutf kā mamnūn hai dil

magar ye pursish-e-bār-e-digar kyā

na jaanā jis ne rāz-e-marg-o-hastī

vo kyā samjhe ki hai terī nazar kyā

bahut dushvār thī rāh-e-mohabbat

hamārā saath dete ham-safar kyā

sitāroñ kī bhī umreñ ho ga.iiñ ḳhatm

na hogā qissa-e-ġham muḳhtasar kyā

sahar apnī na apnī shaam ai 'naqsh'

kisī majbūr ke shām-o-sahar kyā

hua hai ahl-e-sahil par asar kya

tujhe ai Dubne wale KHabar kya

wahi hai chashm-e-nargis ka tahayyur

nahin gulshan mein koi dida-war kya

safina kyun tah-e-girdab aaya

talatum-KHez maujon ko KHabar kya

nigah-e-lutf ka mamnun hai dil

magar ye pursish-e-bar-e-digar kya

na jaana jis ne raaz-e-marg-o-hasti

wo kya samjhe ki hai teri nazar kya

bahut dushwar thi rah-e-mohabbat

hamara sath dete ham-safar kya

sitaron ki bhi umren ho gain KHatm

na hoga qissa-e-gham muKHtasar kya

sahar apni na apni sham ai 'naqsh'

kisi majbur ke sham-o-sahar kya