hua hai ishq taza ibtidai aah hoti hai

huā hai ishq taaza ibtidā.ī aah hotī hai

mubārak tifl-e-dil kī aaj bismillāh hotī hai

milā jab dirham-e-dāġh-e-junūñ ghabrā ke dil bolā

yahī kyā ishq kī sarkār meñ tanḳhvāh hotī hai

bayāñ kartā nahīñ dil vasf us rū-e-muḳhattat kā

ḳhudā ke ghar meñ tafsīr-e-kalāmullāh hotī hai

faroġh apnā sivā hotā hai zulm-e-charḳh-e-gardāñ se

jo dil jaltā hai raushan aur sham-e-āh hotī hai

hua hai ishq taza ibtidai aah hoti hai

mubarak tifl-e-dil ki aaj bismillah hoti hai

mila jab dirham-e-dagh-e-junun ghabra ke dil bola

yahi kya ishq ki sarkar mein tanKHwah hoti hai

bayan karta nahin dil wasf us ru-e-muKHattat ka

KHuda ke ghar mein tafsir-e-kalamullah hoti hai

farogh apna siwa hota hai zulm-e-charKH-e-gardan se

jo dil jalta hai raushan aur sham-e-ah hoti hai