hua hai teri mohabbat ka hausla saqi

huā hai terī mohabbat kā hausla saaqī

magar garāñ hai qanā.at kā marhala saaqī

nazar nazar meñ jagah DhūñDhtā rahā mai-kash

koī to jāntā rindī kā martaba saaqī

balā kashān-e-dar-e-mai-kada kahāñ jaa.eñ

qadam qadam hai qayāmat kā fāsla saaqī

mirī hayāt kā sab kuchh fazā-e-mai-ḳhāna

subū-o-jām tirā ek mashġhala saaqī

ye dasht-e-tishna-labī hai shikasta ḳheme haiñ

kahāñ gayā mire armāñ kā qāfila saaqī

amaañ se duur hai sahrā-e-ārzū kī tapish

hayāt-e-soz-e-tamannā kā aabla saaqī

hayāt kyā hai mohabbat hai kyuuñ jamāl hai kyā

na hal huā kabhī 'aḳhtar' kā mas.ala saaqī

hua hai teri mohabbat ka hausla saqi

magar garan hai qanaat ka marhala saqi

nazar nazar mein jagah DhunDhta raha mai-kash

koi to jaanta rindi ka martaba saqi

bala kashan-e-dar-e-mai-kada kahan jaen

qadam qadam hai qayamat ka fasla saqi

meri hayat ka sab kuchh faza-e-mai-KHana

subu-o-jam tera ek mashghala saqi

ye dasht-e-tishna-labi hai shikasta KHeme hain

kahan gaya mere arman ka qafila saqi

aman se dur hai sahra-e-arzu ki tapish

hayat-e-soz-e-tamanna ka aabla saqi

hayat kya hai mohabbat hai kyun jamal hai kya

na hal hua kabhi 'aKHtar' ka masala saqi