hua jo unki KHamoshi se kuchh malal mujhe

huā jo un kī ḳhamoshī se kuchh malāl mujhe

javāb dene lagī tāqat-e-savāl mujhe

kisī ke dil se kisī kī nazar se girtā huuñ

sañbhālnā hai to ai āsmāñ sambhāl mujhe

umīd-e-bosa hai phir bhī agarche ye hai yaqīñ

bahut zalīl karegā mirā savāl mujhe

sadā-e-nāla shab-e-vasl bhī na dil se ga.ī

pukārtī thī ye hasrat mirī nikāl mujhe

pilā de bazm meñ saaqī use sharāb itnī

vo mast-e-nāz kahe mujh se tū sañbhāl mujhe

shikāyatoñ se mohabbat kī aur kyā hāsil

kuchh infi.āl tumheñ ho kuchh infi.āl mujhe

asīr-e-halqa-e-kākul na maiñ huā ai 'dāġh'

mire ḳhudā ne bachāyā hai bāl-bāl mujhe

hua jo un ki KHamoshi se kuchh malal mujhe

jawab dene lagi taqat-e-sawal mujhe

kisi ke dil se kisi ki nazar se girta hun

sanbhaalna hai to ai aasman sambhaal mujhe

umid-e-bosa hai phir bhi agarche ye hai yaqin

bahut zalil karega mera sawal mujhe

sada-e-nala shab-e-wasl bhi na dil se gai

pukarti thi ye hasrat meri nikal mujhe

pila de bazm mein saqi use sharab itni

wo mast-e-naz kahe mujh se tu sanbhaal mujhe

shikayaton se mohabbat ki aur kya hasil

kuchh infial tumhein ho kuchh infial mujhe

asir-e-halqa-e-kakul na main hua ai 'dagh'

mere KHuda ne bachaya hai baal-baal mujhe