hua karega har ek lafz mushk-bar apna

huā karegā har ik lafz mushk-bār apnā

abhī sukūñ se kiye jaao intizār apnā

uThā liyā hai halaf garche jāñ-nisārī kā

mujhe sambhāl ki hotā huuñ baar baar apnā

udaas aañkh ko hai intizār fasl-e-murād

kabhī to mausam-e-jāñ hogā sāzgār apnā

tumhāre dar se uThā.e ga.e malāl nahīñ

vahāñ to chhoḌ ke aa.e haiñ ham ġhubār apnā

bahut buland huī jaatī hai anā kī fasīl

so ham bhī tañg kiye jaate haiñ hisār apnā

har ik charāġh ko hai dushmanī havā ke saath

bechārī le ke kahāñ jaa.e intishār apnā

hua karega har ek lafz mushk-bar apna

abhi sukun se kiye jao intizar apna

uTha liya hai halaf garche jaan-nisari ka

mujhe sambhaal ki hota hun bar bar apna

udas aankh ko hai intizar fasl-e-murad

kabhi to mausam-e-jaan hoga sazgar apna

tumhaare dar se uThae gae malal nahin

wahan to chhoD ke aae hain hum ghubar apna

bahut buland hui jati hai ana ki fasil

so hum bhi tang kiye jate hain hisar apna

har ek charagh ko hai dushmani hawa ke sath

bechaari le ke kahan jae intishaar apna