hudud-e-akl-o-sharb ka sawal hi nahin raha

hudūd-e-akl-o-sharb kā savāl hī nahīñ rahā

diloñ meñ ḳhauf-e-rabb-e-zul-jalāl hī nahīñ rahā

ma.āl-e-arz-e-hāl kā malāl hī nahīñ rahā

vo bazm-e-ġhair thī mujhe ḳhayāl hī nahīñ rahā

jabhī to bāġhbāñ kī guftugū meñ jhol dekhte

kabhī kisī tarah kā ehtimāl hī nahīñ rahā

ye vasvase kī baat apne muñh se mat nikāliye

koī sharīk-e-hāl-e-pur-malāl hī nahīñ rahā

jalāl ko bhī vaqt ne samo diyā hai sher meñ

ġhazal kā matmah-e-nazar jamāl hī nahīñ rahā

tasalliyoñ ke zail meñ dilā rahe ho yaad kyuuñ

tabāhiyoñ kā jab mujhe ḳhayāl hī nahīñ rahā

mire bayān-e-hāl-e-dard-e-dil meñ chāra-kār ne

vo rañg bhar diyā ki merā haal hī nahīñ rahā

jahāñ shabāb-o-shaġhl-e-mai ne kho diye the hosh tak

maiñ bin-piye uThā to kuchh kamāl hī nahīñ rahā

ḳhudā-e-kār-sāz ke karam se 'shād'-ārfī

kabhī mujhe salīqa-e-savāl hī nahīñ rahā

hudud-e-akl-o-sharb ka sawal hi nahin raha

dilon mein KHauf-e-rabb-e-zul-jalal hi nahin raha

maal-e-arz-e-haal ka malal hi nahin raha

wo bazm-e-ghair thi mujhe KHayal hi nahin raha

jabhi to baghban ki guftugu mein jhol dekhte

kabhi kisi tarah ka ehtimal hi nahin raha

ye waswase ki baat apne munh se mat nikaliye

koi sharik-e-haal-e-pur-malal hi nahin raha

jalal ko bhi waqt ne samo diya hai sher mein

ghazal ka matmah-e-nazar jamal hi nahin raha

tasalliyon ke zail mein dila rahe ho yaad kyun

tabahiyon ka jab mujhe KHayal hi nahin raha

mere bayan-e-haal-e-dard-e-dil mein chaara-kar ne

wo rang bhar diya ki mera haal hi nahin raha

jahan shabab-o-shaghl-e-mai ne kho diye the hosh tak

main bin-piye uTha to kuchh kamal hi nahin raha

KHuda-e-kar-saz ke karam se 'shad'-arfi

kabhi mujhe saliqa-e-sawal hi nahin raha