hue aise ba-dil tere shefta hum dil-o-jaan ko hamesha nisar kiya

hue aise ba-dil tire shefta ham dil-o-jāñ ko hamesha nisār kiyā

rah-e-ishq se phir na haTā.e qadam rahe mahv tire tujhe pyaar kiyā

tire shauq meñ dil kī tabāhī huī tire zauq kī us pe gavāhī huī

koī dam bhī na lene diyā mujhe dam mujhe dushman-e-sabr-o-qarār kiyā

ga.ī jaañ qafas meñ barā-e-chaman chalī le ke jahāñ se havā-e-chaman

kabhī abr-e-karam ne kiyā na karam na kisī ne bayān-e-bahār kiyā

jahāñ mahke mahak gayā saarā jahāñ bhalā itr ko bū ye nasīb kahāñ

ba-ḳhudā hī ḳhatā kaheñ mushk-bū ham tirī zulf pe sadqe nisār kiyā

na lo ishq kā naam ye kahte ho kyā jo ho teġh-tale bhī hamārā galā

yahī ham kahe jaa.eñ ḳhudā kī qasam tumheñ pyaar kiyā tumheñ pyaar kiyā

tire haath se maiñ jo shahīd huā mirī ruuh kā ishq murīd huā

jo hayāt rahā to na chhoḌe qadam jo marā to tavāf-e-mazār kiyā

tire shauq ne ham ko jo ḳhaak kiyā tire zauq ne ḳhaak se paak kiyā

tire rañg ne mujh pe kiyā ye karam mujhe tere chaman kā ġhubār kiyā

tire tīr-e-hadaf kī havas thī mujhe baḌī hasrat-e-kunj-e-nafas thī mujhe

mujhe chuuk kiyā ye ġhazab ye sitam na asiir kiyā na shikār kiyā

tujhe chāhā to rañg ye miT ke jame tire baaġh meñ ḳhaak se paak hue

mare tere chaman kī havas meñ jo ham to ġhubār ko abr-e-bahār kiyā

na adam kī jo mujh ko savārī milī koī taḳht-e-ravāñ na amārī milī

ka.ī dostoñ ne mire ho ke baham mujhe dosh par apnī savār kiyā

hameñ is kī kahīñ se ḳhabar na milī huī umr tamām magar na milī

kabhī us ne bhī haal kiyā na raqam ḳhat-e-shauq ravāna hazār kiyā

tire roz-e-azal se farefta haiñ tire husn-o-jamāl ke shefta haiñ

tire ishq meñ ho ga.e kushta-e-ġham vahī kar ga.e qaul jo yaar kiyā

tire bas meñ jo aa.e to ḳhaak hue jo ġhubār hue bhī to ḳhaak hue

rahe ba.ad-e-fanā bhī na chain se ham hameñ gardish-e-lail-o-nahār kiyā

kabhī sair-e-chaman kā na shauq huā kisī bazm kā ham ko na zauq huā

tire kūche ko jaan ke bāġh-e-iram yahīñ bulbul-e-jāñ ko nisār kiyā

jise chāhā dil us pe nisār kareñ kabhī god meñ leñ kabhī pyaar kareñ

ye burā.ī nasīb kī vā.e-sitam vo harīf huā jise pyaar kiyā

mujhe yaar ne aa ke jo dekhā hazīñ kahā ro.e ho maiñ ne kahā ki nahīñ

vo kahe ga.e āñkhoñ pe kyuuñ hai varam 'sharaf' un se bahāna hazār kiyā

hue aise ba-dil tere shefta hum dil-o-jaan ko hamesha nisar kiya

rah-e-ishq se phir na haTae qadam rahe mahw tere tujhe pyar kiya

tere shauq mein dil ki tabahi hui tere zauq ki us pe gawahi hui

koi dam bhi na lene diya mujhe dam mujhe dushman-e-sabr-o-qarar kiya

gai jaan qafas mein bara-e-chaman chali le ke jahan se hawa-e-chaman

kabhi abr-e-karam ne kiya na karam na kisi ne bayan-e-bahaar kiya

jahan mahke mahak gaya sara jahan bhala itr ko bu ye nasib kahan

ba-KHuda hi KHata kahen mushk-bu hum teri zulf pe sadqe nisar kiya

na lo ishq ka nam ye kahte ho kya jo ho tegh-tale bhi hamara gala

yahi hum kahe jaen KHuda ki qasam tumhein pyar kiya tumhein pyar kiya

tere hath se main jo shahid hua meri ruh ka ishq murid hua

jo hayat raha to na chhoDe qadam jo mara to tawaf-e-mazar kiya

tere shauq ne hum ko jo KHak kiya tere zauq ne KHak se pak kiya

tere rang ne mujh pe kiya ye karam mujhe tere chaman ka ghubar kiya

tere tir-e-hadaf ki hawas thi mujhe baDi hasrat-e-kunj-e-nafas thi mujhe

mujhe chuk kiya ye ghazab ye sitam na asir kiya na shikar kiya

tujhe chaha to rang ye miT ke jame tere bagh mein KHak se pak hue

mare tere chaman ki hawas mein jo hum to ghubar ko abr-e-bahaar kiya

na adam ki jo mujh ko sawari mili koi taKHt-e-rawan na amari mili

kai doston ne mere ho ke baham mujhe dosh par apni sawar kiya

hamein is ki kahin se KHabar na mili hui umr tamam magar na mili

kabhi us ne bhi haal kiya na raqam KHat-e-shauq rawana hazar kiya

tere roz-e-azal se farefta hain tere husn-o-jamal ke shefta hain

tere ishq mein ho gae kushta-e-gham wahi kar gae qaul jo yar kiya

tere bas mein jo aae to KHak hue jo ghubar hue bhi to KHak hue

rahe baad-e-fana bhi na chain se hum hamein gardish-e-lail-o-nahaar kiya

kabhi sair-e-chaman ka na shauq hua kisi bazm ka hum ko na zauq hua

tere kuche ko jaan ke bagh-e-iram yahin bulbul-e-jaan ko nisar kiya

jise chaha dil us pe nisar karen kabhi god mein len kabhi pyar karen

ye burai nasib ki wae-sitam wo harif hua jise pyar kiya

mujhe yar ne aa ke jo dekha hazin kaha roe ho main ne kaha ki nahin

wo kahe gae aankhon pe kyun hai waram 'sharaf' un se bahana hazar kiya