hue jab se mohabbat-ashna hum

hue jab se mohabbat-āshnā ham

nahīñ laate zabāñ par mudda.ā ham

sa.ādat hai jo ban jaa.eñ jahāñ meñ

kisī majbūr dil kā aasrā ham

chalā.e tiir chhup-chhup kar jinhoñ ne

kareñge un ke haq meñ bhī duā ham

miTegā dāġh-e-sajda kab jabīñ se

ḳhudā jaane baneñge kab ḳhudā ham

hamāre darmiyāñ kyuuñ fāsle haiñ

kabhī sochā na ham ne mil ke bāham

ḳhamoshī maslak-e-sāhab-dilāñ hai

kisī ko bhī nahīñ kahte burā ham

hamārī ruuh naġhma-ḳhvāñ rahegī

fanā ho kar nahīñ hoñge fanā ham

hameñ hai e'timād apnī vafā par

nahīñ karte kisī kā bhī gilā ham

zamāna-sāz nikle tum to kyā hai

zarā sī baat ko kyā deñ havā ham

agar izzat na dī ahl-e-haram ne

uThā lā.eñge apnā boriyā ham

tasavvur bhī nahīñ baaqī ḳhushī kā

ġham-e-duniyā meñ yuuñ haiñ mubtalā ham

musalsal ḳhāmushī ke ba.ad 'rif.at'

sar-e-maqtal hue haiñ lab-kushā ham

hue jab se mohabbat-ashna hum

nahin late zaban par muddaa hum

saadat hai jo ban jaen jahan mein

kisi majbur dil ka aasra hum

chalae tir chhup-chhup kar jinhon ne

karenge un ke haq mein bhi dua hum

miTega dagh-e-sajda kab jabin se

KHuda jaane banenge kab KHuda hum

hamare darmiyan kyun fasle hain

kabhi socha na hum ne mil ke baham

KHamoshi maslak-e-sahab-dilan hai

kisi ko bhi nahin kahte bura hum

hamari ruh naghma-KHwan rahegi

fana ho kar nahin honge fana hum

hamein hai e'timad apni wafa par

nahin karte kisi ka bhi gila hum

zamana-saz nikle tum to kya hai

zara si baat ko kya den hawa hum

agar izzat na di ahl-e-haram ne

uTha laenge apna boriya hum

tasawwur bhi nahin baqi KHushi ka

gham-e-duniya mein yun hain mubtala hum

musalsal KHamushi ke baad 'rifat'

sar-e-maqtal hue hain lab-kusha hum