hujum-e-gham se yan tak sar-niguni mujhko hasil hai

hujūm-e-ġham se yaañ tak sar-nigūnī mujh ko hāsil hai

ki tār-e-dāman o tār-e-nazar meñ farq mushkil hai

rafū-e-zaḳhm se matlab hai lazzat zaḳhm-e-sozan kī

samajhiyo mat ki pās-e-dard se dīvāna ġhāfil hai

vo gul jis gulsitāñ meñ jalva-farmā.ī kare 'ġhālib'

chaTaknā ġhuncha-e-gul kā sadā-e-ḳhanda-e-dil hai

huā hai māne-e-āshiq-navāzī nāz-e-ḳhud-bīnī

takalluf-bar-taraf ā.īna-e-tam.īz haa.el hai

ba-sail-e-ashk laḳht-e-dil hai dāman-gīr mizhgāñ kā

ġharīq-e-bahr jūyā-e-ḳhas-o-ḳhāshāk-e-sāhil hai

bahā hai yaañ tak ashkoñ meñ ġhubār-e-kulfat-e-ḳhātir

ki chashm-e-tar meñ har ik pāra-e-dil pā-e-dar-gil hai

nikaltī hai tapish meñ bismiloñ kī barq kī shoḳhī

ġharaz ab tak ḳhayāl-e-garmī-e-raftār qātil hai

hujum-e-gham se yan tak sar-niguni mujh ko hasil hai

ki tar-e-daman o tar-e-nazar mein farq mushkil hai

rafu-e-zaKHm se matlab hai lazzat zaKHm-e-sozan ki

samajhiyo mat ki pas-e-dard se diwana ghafil hai

wo gul jis gulsitan mein jalwa-farmai kare 'ghaalib'

chaTakna ghuncha-e-gul ka sada-e-KHanda-e-dil hai

hua hai mane-e-ashiq-nawazi naz-e-KHud-bini

takalluf-bar-taraf aaina-e-tamiz hael hai

ba-sail-e-ashk laKHt-e-dil hai daman-gir mizhgan ka

ghariq-e-bahr juya-e-KHas-o-KHashak-e-sahil hai

baha hai yan tak ashkon mein ghubar-e-kulfat-e-KHatir

ki chashm-e-tar mein har ek para-e-dil pa-e-dar-gil hai

nikalti hai tapish mein bismilon ki barq ki shoKHi

gharaz ab tak KHayal-e-garmi-e-raftar qatil hai