hujum-e-gham-zadagan sabr se mukar nahin jae

hujūm-e-ġham-zadagāñ sabr se mukar nahīñ jaa.e

aur ittihām usī bebasī ke sar nahīñ jaa.e

nikalne hī ko hai mahtāb bādaloñ se abhī

ye intizār isī āsare pe mar nahīñ jaa.e

bahut zarūrī diyoñ kā havāoñ se hai bachāo

ki sāz-bāz-e-havas kuchh kamāl kar nahīñ jaa.e

maiñ phuul bāñTne niklūñ to Dar bhī saath phire

lahū se kāsa-e-gul be-qayās bhar nahīñ jaa.e

ye kyā hai aisā ki sihran sī saare jism meñ hai

kueñ meñ aag ke duniyā kahīñ utar nahīñ jaa.e

milī bhī sā.at-e-qurbat to shāḳh chhū na sake

fishār-e-ḳhūn badan meñ kahīñ biphar nahīñ jaa.e

sameTte to haiñ ham laḳht-e-jāñ pe sochte haiñ

havā-e-tund meñ phir se makāñ bikhar nahīñ jaa.e

hujum-e-gham-zadagan sabr se mukar nahin jae

aur ittiham usi bebasi ke sar nahin jae

nikalne hi ko hai mahtab baadalon se abhi

ye intizar isi aasare pe mar nahin jae

bahut zaruri diyon ka hawaon se hai bachao

ki saz-baz-e-hawas kuchh kamal kar nahin jae

main phul banTne niklun to Dar bhi sath phire

lahu se kasa-e-gul be-qayas bhar nahin jae

ye kya hai aisa ki sihran si sare jism mein hai

kuen mein aag ke duniya kahin utar nahin jae

mili bhi saat-e-qurbat to shaKH chhu na sake

fishaar-e-KHun badan mein kahin biphar nahin jae

sameTte to hain hum laKHt-e-jaan pe sochte hain

hawa-e-tund mein phir se makan bikhar nahin jae