hujum-e-shab mein ghiri raushni ko pahchano

hujūm-e-shab meñ ghirī raushnī ko pahchāno

ajal ke saath laḌo zindagī ko pahchāno

hamesha chaḌh ke nadī ek din utartī hai

zamīñ kī pyaas bujhāo nadī ko pahchāno

shajar kī shāḳh kī gul kī fasurdagī dekho

kalī kalī kī kabhī be-kalī ko pahchāno

kaTā nahīñ kisī koh-e-sitam kā dil ab tak

ḳhirad se kaam lo tesha-garī ko pahchāno

bahāreñ dekh chuke vajd-o-be-ḳhudī kī bahut

na.ī rutoñ meñ gul-e-āgahī ko pahchāno

jafā miTā ke chalo dushmanī kuchal ke baḌho

vafā kī qadr karo dostī ko pahchāno

'hazīñ' shanāḳht ḳhudā kī bashar ke bas meñ nahīñ

yahī bahut hai ki tum aadmī ko pahchāno

hujum-e-shab mein ghiri raushni ko pahchano

ajal ke sath laDo zindagi ko pahchano

hamesha chaDh ke nadi ek din utarti hai

zamin ki pyas bujhao nadi ko pahchano

shajar ki shaKH ki gul ki fasurdagi dekho

kali kali ki kabhi be-kali ko pahchano

kaTa nahin kisi koh-e-sitam ka dil ab tak

KHirad se kaam lo tesha-gari ko pahchano

bahaaren dekh chuke wajd-o-be-KHudi ki bahut

nai ruton mein gul-e-agahi ko pahchano

jafa miTa ke chalo dushmani kuchal ke baDho

wafa ki qadr karo dosti ko pahchano

'hazin' shanaKHt KHuda ki bashar ke bas mein nahin

yahi bahut hai ki tum aadmi ko pahchano