hujum-e-shahr se hai ab talash-e-virana

hujūm-e-shahr se hai ab talāsh-e-vīrāna

ḳhirad kī bhiiḌ se ghabrā gayā hai dīvāna

kushāda zarf hai kitnī ye bazm-e-rindāna

janāb-e-shaiḳh ko samjhā nahīñ hai begāna

kitāb-e-zīst hai majmūa ik fasānoñ kā

usī meñ hai kahīñ merā bhī ek afsāna

pilā kuchh aur ai saaqī ki hosh hai ab tak

kisī kī yaad meñ haa.il hai shor-e-mai-ḳhāna

jise bhī dekhiye mātam-guzār-e-qismat hai

havas ne kar diyā duniyā ko ik azā-ḳhāna

hamīñ se mai-kada 'sālik' hamīñ raheñ pyāse

chalo uTho ki badal deñ nizām-e-mai-ḳhāna

hujum-e-shahr se hai ab talash-e-virana

KHirad ki bhiD se ghabra gaya hai diwana

kushada zarf hai kitni ye bazm-e-rindana

janab-e-shaiKH ko samjha nahin hai begana

kitab-e-zist hai majmua ek fasanon ka

usi mein hai kahin mera bhi ek afsana

pila kuchh aur ai saqi ki hosh hai ab tak

kisi ki yaad mein hail hai shor-e-mai-KHana

jise bhi dekhiye matam-guzar-e-qismat hai

hawas ne kar diya duniya ko ek aza-KHana

hamin se mai-kada 'salik' hamin rahen pyase

chalo uTho ki badal den nizam-e-mai-KHana