hujum-e-yas mein lene wo kab KHabar aaya

hujūm-e-yās meñ lene vo kab ḳhabar aayā

ajal na aa.ī to ġhash kis umiid par aayā

bichhe haiñ kū-e-sitamgar meñ jā-ba-jā ḳhanjar

rag-e-gulū kā lahū paañv meñ utar aayā

dikhā.ī marg ne kyā kyā bulandī o pastī

chale zamīñ ke tale āsmāñ nazar aayā

hamesha afv tirā hai gunāh kā haamī

hamesha rahm tujhe mere haal par aayā

butoñ meñ koī bhalā.ī bhī hai sivā.e sitam

burā ho terā dil-e-nā-sazā kidhar aayā

banā.ī baat bigaḌne ne roz-e-mahshar bhī

uThe haiñ ḳhaak se ham jab vo gor par aayā

kahāñ kī āh-o-bukā baat ban ga.ī 'shola'

zabāñ ke hilte hī fariyād meñ asar aayā

hujum-e-yas mein lene wo kab KHabar aaya

ajal na aai to ghash kis umid par aaya

bichhe hain ku-e-sitamgar mein ja-ba-ja KHanjar

rag-e-gulu ka lahu panw mein utar aaya

dikhai marg ne kya kya bulandi o pasti

chale zamin ke tale aasman nazar aaya

hamesha afw tera hai gunah ka hami

hamesha rahm tujhe mere haal par aaya

buton mein koi bhalai bhi hai siwae sitam

bura ho tera dil-e-na-saza kidhar aaya

banai baat bigaDne ne roz-e-mahshar bhi

uThe hain KHak se hum jab wo gor par aaya

kahan ki aah-o-buka baat ban gai 'shola'

zaban ke hilte hi fariyaad mein asar aaya