hunar ki kar-gah se shai ajab nikal aae

hunar kī kār-gah se shai ajab nikal aa.e

maiñ din banātā rahūñ aur vo shab nikal aa.e

dalīl apnī jagah par ye ain-mumkin hai

ki be-sabab kā bhī koī sabab nikal aa.e

koī sitāra thā hairat bharā nazāra thā

gharoñ meñ so.e hue log sab nikal aa.e

nikalnā hai isī shab māh-e-vasl ne lekin

yaqīñ se kah nahīñ saktā ki kab nikal aa.e

maiñ dekhne meñ bahut mahv thā tirī tasvīr

ki chūmne ko mujhe tere lab nikal aa.e

ai be-niyāz jahāñ kuchh to ġhaur kar shāyad

kahīñ dabī huī koī talab nikal aa.e

burī tarah se haiñ din dhund kī hirāsat meñ

kisī taraf se zarā dhuup ab nikal aa.e

maza to jab hai udāsī kī shaam ho 'shāhīñ'

aur us ke biich se shām-e-tarab nikal aa.e

hunar ki kar-gah se shai ajab nikal aae

main din banata rahun aur wo shab nikal aae

dalil apni jagah par ye ain-mumkin hai

ki be-sabab ka bhi koi sabab nikal aae

koi sitara tha hairat bhara nazara tha

gharon mein soe hue log sab nikal aae

nikalna hai isi shab mah-e-wasl ne lekin

yaqin se kah nahin sakta ki kab nikal aae

main dekhne mein bahut mahw tha teri taswir

ki chumne ko mujhe tere lab nikal aae

ai be-niyaz jahan kuchh to ghaur kar shayad

kahin dabi hui koi talab nikal aae

buri tarah se hain din dhund ki hirasat mein

kisi taraf se zara dhup ab nikal aae

maza to jab hai udasi ki sham ho 'shahin'

aur us ke bich se sham-e-tarab nikal aae