jab KHizan aae to patte na samar bachta hai

jab ḳhizāñ aa.e to patte na samar bachtā hai

ḳhālī jholī liye vīrān shajar bachtā hai

nukta-chīñ shauq se din raat mire 'aib nikāl

kyūñki jab 'aib nikal jaa.eñ hunar bachtā hai

saare Dar bas isī Dar se haiñ ki kho jaa.e na yaar

yaar kho jaa.e to phir kaun sā Dar bachtā hai

roz pathrāv bahut karte haiñ duniyā vaale

roz mar mar ke mirā ḳhvāb-nagar bachtā hai

ġham vo rasta hai ki shab bhar use tai karne ke baad

sub.h-dam dekheñ to utnā hī safar bachtā hai

bas yahī soch ke aayā huuñ tirī chaukhaT par

dar-ba-dar hone ke baa'd ik yahī dar bachtā hai

ab mare 'aib zada shahr ke shar se sāhib

shāz-o-nādir hī koī ahl-e-hunar bachtā hai

'ishq vo 'ilm-e-riyāzī hai ki jis meñ fāris

do se jab ek nikāleñ to sifar bachtā hai

jab KHizan aae to patte na samar bachta hai

KHali jholi liye viran shajar bachta hai

nukta-chin shauq se din raat mere 'aib nikal

kyunki jab 'aib nikal jaen hunar bachta hai

sare Dar bas isi Dar se hain ki kho jae na yar

yar kho jae to phir kaun sa Dar bachta hai

roz pathraw bahut karte hain duniya wale

roz mar mar ke mera KHwab-nagar bachta hai

gham wo rasta hai ki shab bhar use tai karne ke baad

subh-dam dekhen to utna hi safar bachta hai

bas yahi soch ke aaya hun teri chaukhaT par

dar-ba-dar hone ke ba'd ek yahi dar bachta hai

ab mare 'aib zada shahr ke shar se sahib

shaz-o-nadir hi koi ahl-e-hunar bachta hai

'ishq wo 'ilm-e-riyazi hai ki jis mein faris

do se jab ek nikalen to sifar bachta hai