hurmat-e-ishq tujhe dagh lagane ka nahin

hurmat-e-ishq tujhe daaġh lagāne kā nahīñ

baat bantī na bane baat se jaane kā nahīñ

yā-ḳhudā ḳhair ki ham donoñ anā vaale haiñ

vo bulāne kā nahīñ aur maiñ jaane kā nahīñ

vahshatī huuñ so garebān ko aa saktā huuñ

mujh se Darne kā magar mujh ko Darāne kā nahīñ

būḌhe a.asāb kahāñ sahte haiñ aulād kā dukh

merī taklīf mirī maañ ko batāne kā nahīñ

ham to ik aisī zamīñ par haiñ jahāñ lāsheñ haiñ

tum ne jo naqsha diyā thā vo ḳhazāne kā nahīñ

maiñ azal tā-ba-abad aur abad tā-dā.im

is kā matlab maiñ kisī ek zamāne kā nahīñ

dars ye ḳhaas hameñ āl-e-payambar se milā

sar kaTāne kā magar sar ko jhukāne kā nahīñ

maiñ abū-bakr-o-alī vaalā huuñ 'yūnus-tahsīn'

mujh ko mullā ke masālik se milāne kā nahīñ

hurmat-e-ishq tujhe dagh lagane ka nahin

baat banti na bane baat se jaane ka nahin

ya-KHuda KHair ki hum donon ana wale hain

wo bulane ka nahin aur main jaane ka nahin

wahshati hun so gareban ko aa sakta hun

mujh se Darne ka magar mujh ko Darane ka nahin

buDhe aasab kahan sahte hain aulad ka dukh

meri taklif meri man ko batane ka nahin

hum to ek aisi zamin par hain jahan lashen hain

tum ne jo naqsha diya tha wo KHazane ka nahin

main azal ta-ba-abad aur abad ta-daim

is ka matlab main kisi ek zamane ka nahin

dars ye KHas hamein aal-e-payambar se mila

sar kaTane ka magar sar ko jhukane ka nahin

main abu-bakr-o-ali wala hun 'yunus-tahsin'

mujh ko mulla ke masalik se milane ka nahin