حسن جاناں تھا بام پر تنہا

حسن جاناں تھا بام پر تنہا

سارے عالم کو لوٹ کر تنہا

زندگی کے قمار خانے میں

خود کو پایا ہے کس قدر تنہا

ساتھ سیارے چل نہیں پائے

زیر گردوں رہا قمر تنہا

شمع بھی ساتھ اس کے جلتی ہے

جو سلگتا ہے رات بھر تنہا

کوئی ارماں نہیں رہا باقی

تری یادوں کا ہے اثر تنہا

کب کسی شے کی آرزو کی ہے

تجھ پہ شیدا رہی نظر تنہا

بے جا خواہش کا مرتکب ہو کر

زیست میں بس رہا بشر تنہا

اتنا سیکھا ہے چاند تاروں سے

ساتھ رہ کر کریں سفر تنہا

ہر طرف آئنے میں میں ہی تھا

عمر گزری ہے اس قدر تنہا

شادؔ اس زندگی کا بس تجھ کو

بوجھ ڈھونا ہے عمر بھر تنہا