husn-e-kafir-shabab ka aalam

husn-e-kāfir-shabāb kā aalam

sar se pā tak sharāb kā aalam

araq-ālūd chehra-e-tābāñ

shabnam-o-āftāb kā aalam

vo mirī arz-e-shauq-e-behad par

kuchh hayā kuchh itaab kā aalam

allāh allāh vo imtizāj-e-latīf

shoḳhiyoñ meñ hijāb kā aalam

hama nūr-o-surūr kī duniyā

hama husn-o-shabāb kā aalam

vo lab-e-jūebār o mausam-e-gul

vo shab-e-māhtāb kā aalam

zānū-e-shauq par vo pichhle pahar

nargis-e-nīm-ḳhvāb kā aalam

der tak iḳhtilāt-e-rāz-o-niyāz

yak-ba-yak ijtināb kā aalam

laakh rañgīñ-bayāniyoñ pe mirī

ek saada javāb kā aalam

ġham kī har mauj mauj-e-tūfāñ-ḳhez

dil kā aalam habāb kā aalam

dil-e-mutrib samajh sake shāyad

ik shikasta rubāb kā aalam

vo samāñ aaj bhī hai yaad 'jigar'

haañ magar jaise ḳhvāb kā aalam

husn-e-kafir-shabab ka aalam

sar se pa tak sharab ka aalam

araq-alud chehra-e-taban

shabnam-o-aftab ka aalam

wo meri arz-e-shauq-e-behad par

kuchh haya kuchh itab ka aalam

allah allah wo imtizaj-e-latif

shoKHiyon mein hijab ka aalam

hama nur-o-surur ki duniya

hama husn-o-shabab ka aalam

wo lab-e-juebar o mausam-e-gul

wo shab-e-mahtab ka aalam

zanu-e-shauq par wo pichhle pahar

nargis-e-nim-KHwab ka aalam

der tak iKHtilat-e-raaz-o-niyaz

yak-ba-yak ijtinab ka aalam

lakh rangin-bayaniyon pe meri

ek sada jawab ka aalam

gham ki har mauj mauj-e-tufan-KHez

dil ka aalam habab ka aalam

dil-e-mutrib samajh sake shayad

ek shikasta rubab ka aalam

wo saman aaj bhi hai yaad 'jigar'

han magar jaise KHwab ka aalam