husn-e-surat dekh kar rang-e-tabiat dekh kar

husn-e-sūrat dekh kar rañg-e-tabī.at dekh kar

mahv-e-hairat huuñ savād-e-bazm-e-ġhurbat dekh kar

mujh se pūchhe raaz kī bāteñ mujhe ma.alūm haiñ

kyuuñ pareshāñ ho koī nairañg-e-fitrat dekh kar

vāqi.a hai vāqi.a ahl-e-nazar se pūchhiye

husn bhī hairat meñ hai shān-e-mohabbat dekh kar

tez-gāmī muqtazā-e-josh-e-ulfat hī sahī

lekin ai rahrav nuqūsh-e-rāh-e-ulfat dekh kar

ai vatan sub.h-e-vatan shām-e-vatan ahl-e-vatan

yaad aatī hai tumhārī dasht-e-ġhurbat dekh kar

mere saaqī tere qurbāñ kyā kahūñ kis se kahūñ

zarf-e-mai-kash dekh kar rañg-e-tabī.at dekh kar

be-ḳhudī meñ bhī ḳhayāl-e-husn-e-ḳhuddārī rahe

naġhma-zan ho 'rāz' rañg-e-bazm-e-ġhurbat dekh kar

husn-e-surat dekh kar rang-e-tabiat dekh kar

mahw-e-hairat hun sawad-e-bazm-e-ghurbat dekh kar

mujh se puchhe raaz ki baaten mujhe malum hain

kyun pareshan ho koi nairang-e-fitrat dekh kar

waqia hai waqia ahl-e-nazar se puchhiye

husn bhi hairat mein hai shan-e-mohabbat dekh kar

tez-gami muqtaza-e-josh-e-ulfat hi sahi

lekin ai rahraw nuqush-e-rah-e-ulfat dekh kar

ai watan subh-e-watan sham-e-watan ahl-e-watan

yaad aati hai tumhaari dasht-e-ghurbat dekh kar

mere saqi tere qurban kya kahun kis se kahun

zarf-e-mai-kash dekh kar rang-e-tabiat dekh kar

be-KHudi mein bhi KHayal-e-husn-e-KHuddari rahe

naghma-zan ho 'raaz' rang-e-bazm-e-ghurbat dekh kar