husn-e-taza kanwal ke jaisa hai

husn-e-tāza kañval ke jaisā hai

aur chehra ġhazal ke jaisā hai

rang TuuTī huī javānī kā

ek ujḌe mahal ke jaisā hai

ahl-e-mehnat kī mehnatoñ kā sila

aaj miTTī ke phal ke jaisā hai

zulm par aah bhī nahīñ karte

apnā jiinā ajal ke jaisā hai

vo zamāna thā amn kā dushman

ye zamāna bhī kal ke jaisā hai

kaam hotā hai baat par us kī

azm us kā amal ke jaisā hai

apne māhaul kī ġhalāzat meñ

vo shagufta kañval ke jaisā hai

aaj ke rahbaroñ kā har va.ada

dekhnā guzre pal ke jaisā hai

mulk meñ kyā fasādiyoñ kā hal

aaj cancer ke hal ke jaisā hai

merī uljhan kā silsila shāyad

terī zulfoñ ke bal ke jaisā hai

kis ko manzil milegī ai 'arshad'

azm kis kā amal ke jaisā hai

husn-e-taza kanwal ke jaisa hai

aur chehra ghazal ke jaisa hai

rang TuTi hui jawani ka

ek ujDe mahal ke jaisa hai

ahl-e-mehnat ki mehnaton ka sila

aaj miTTi ke phal ke jaisa hai

zulm par aah bhi nahin karte

apna jina ajal ke jaisa hai

wo zamana tha amn ka dushman

ye zamana bhi kal ke jaisa hai

kaam hota hai baat par us ki

azm us ka amal ke jaisa hai

apne mahaul ki ghalazat mein

wo shagufta kanwal ke jaisa hai

aaj ke rahbaron ka har wada

dekhna guzre pal ke jaisa hai

mulk mein kya fasadiyon ka hal

aaj cancer ke hal ke jaisa hai

meri uljhan ka silsila shayad

teri zulfon ke bal ke jaisa hai

kis ko manzil milegi ai 'arshad'

azm kis ka amal ke jaisa hai