husn hai jaan-e-ghazal aur ishq iman-e-ghazal

husn hai jān-e-ġhazal aur ishq īmān-e-ġhazal

kā.enāt-e-sher meñ hai ḳhuub sāmān-e-ġhazal

sach kahā hai āftāb aamad dalīl-e-āftāb

juz ġhazal dekhā nahīñ hai aur unvān-e-ġhazal

rind hai sāġhar ba-dast aur pārsā mast-e-alast

saya-afgan sar pe donoñ ke hai dāmān-e-ġhazal

talḳhī-e-pand-o-nasā.eh bhī gavārā ho ga.ī

hazrat-e-vā.iz bhī haiñ mamnūn-e-ehsān-e-ġhazal

naġhma-ārā.ī pe hotā hai jo maa.il falsafī

vo bhī khichtā hai sū-e-sahn-e-gulistān-e-ġhazal

naġhz-goī meñ adīm-ul-misl haiñ 'josh'-o-'firāq'

pahle 'hasrat' thā 'jigar' hai aaj sultān-e-ġhazal

go nahīñ hāsil ġhazal-goī meñ mujh ko dastaras

maiñ bhī huuñ 'mahrūm' dil se qā.il-e-shān-e-ġhazal

husn hai jaan-e-ghazal aur ishq iman-e-ghazal

kaenat-e-sher mein hai KHub saman-e-ghazal

sach kaha hai aaftab aamad dalil-e-aftab

juz ghazal dekha nahin hai aur unwan-e-ghazal

rind hai saghar ba-dast aur parsa mast-e-alast

saya-afgan sar pe donon ke hai daman-e-ghazal

talKHi-e-pand-o-nasaeh bhi gawara ho gai

hazrat-e-waiz bhi hain mamnun-e-ehsan-e-ghazal

naghma-arai pe hota hai jo mail falsafi

wo bhi khichta hai su-e-sahn-e-gulistan-e-ghazal

naghz-goi mein adim-ul-misl hain 'josh'-o-'firaq'

pahle 'hasrat' tha 'jigar' hai aaj sultan-e-ghazal

go nahin hasil ghazal-goi mein mujh ko dastaras

main bhi hun 'mahrum' dil se qail-e-shan-e-ghazal