husn ka tazkira jamal ka zikr

husn kā tazkira jamāl kā zikr

kījiye us ke ḳhadd-o-ḳhāl kā zikr

ḳhush-adā aur ḳhush-ḳhisāl kā zikr

husn kā husn ke kamāl kā zikr

khīñchiye naqsha us kī qāmat kā

yā'nī ho sar-tā-pā jamāl kā zikr

us kī āñkhoñ kā tazkira kiije

chhoḌiye dasht ke ġhazāl kā zikr

shab-e-furqat kā ek ik lamha

kartā hai us ke bāl-bāl kā zikr

ek ik naqsh aisā mauzūñ hai

ḳhatm hai us pe e'tidāl kā zikr

kahāñ se lā.ūñ vo kalām ki ho

jis se us husn-e-be-misāl kā zikr

dil kisī taur 'ishq se na rukā

'aql kartī rahī ma.aal kā zikr

ek pal meñ simaT ga.ī hai ziist

kyā kare koī māh-o-sāl kā zikr

lazzat-e-vasl zaḳhm-e-hijr se hai

hijr na.iiñ ho to kyā visāl kā zikr

husn ka tazkira jamal ka zikr

kijiye us ke KHadd-o-KHal ka zikr

KHush-ada aur KHush-KHisal ka zikr

husn ka husn ke kamal ka zikr

khinchiye naqsha us ki qamat ka

ya'ni ho sar-ta-pa jamal ka zikr

us ki aankhon ka tazkira kije

chhoDiye dasht ke ghazal ka zikr

shab-e-furqat ka ek ek lamha

karta hai us ke baal-baal ka zikr

ek ek naqsh aisa mauzun hai

KHatm hai us pe e'tidal ka zikr

kahan se laun wo kalam ki ho

jis se us husn-e-be-misal ka zikr

dil kisi taur 'ishq se na ruka

'aql karti rahi maal ka zikr

ek pal mein simaT gai hai zist

kya kare koi mah-o-sal ka zikr

lazzat-e-wasl zaKHm-e-hijr se hai

hijr nain ho to kya visal ka zikr