husn ke ehtiram ne mara

husn ke ehtirām ne maarā

ishq be-nañg-o-nām ne maarā

vāda-e-nā-tamām ne maarā

roz kī sub.h o shaam ne maarā

larzish-e-dast-e-shauq aah na pūchh

laġhzish-e-nīm-gām ne maarā

ishq kī sādgī to ek taraf

shauq ke ehtimām ne maarā

allāh allāh nafas kī aamad o shud

is payām o salām ne maarā

ishq martā na apnī maut se aah

āsshiqān-e-karām ne maarā

kaash vo umr-e-ḳhizr ban jaa.e

jin ḳhayālāt-e-ḳhām ne maarā

maiñ nahīñ bismil-e-ḳhayyām 'jigar'

hāfiz-e-ḳhush-kalām ne maarā

husn ke ehtiram ne mara

ishq be-nang-o-nam ne mara

wada-e-na-tamam ne mara

roz ki subh o sham ne mara

larzish-e-dast-e-shauq aah na puchh

laghzish-e-nim-gam ne mara

ishq ki sadgi to ek taraf

shauq ke ehtimam ne mara

allah allah nafas ki aamad o shud

is payam o salam ne mara

ishq marta na apni maut se aah

aasshiqan-e-karam ne mara

kash wo umr-e-KHizr ban jae

jin KHayalat-e-KHam ne mara

main nahin bismil-e-KHayyam 'jigar'

hafiz-e-KHush-kalam ne mara