husn KHushbu payam kuchh bhi na thi

husn ḳhushbū payām kuchh bhī na thī

zindagī mere naam kuchh bhī na thī

rañg baḳhshe haiñ terī qurbat ne

varna shahroñ kī shaam kuchh bhī na thī

un kī maḳhsūs ik adā ke sivā

vaj.h-e-tark-e-salām kuchh bhī na thī

zikr hī se tire ujālā thā

sham.a-e-bazm-e-kalām kuchh bhī na thī

aadmī ko nasha thā rūhānī

pahle tauqīr-e-jām kuchh bhī na thī

jaise sahrā kī ho sadā koī

qadr-e-arz-e-avām kuchh bhī na thī

dil-kushā dard ke sivā 'asrār'

vo judā.ī kī shaam kuchh bhī na thī

husn KHushbu payam kuchh bhi na thi

zindagi mere nam kuchh bhi na thi

rang baKHshe hain teri qurbat ne

warna shahron ki sham kuchh bhi na thi

un ki maKHsus ek ada ke siwa

wajh-e-tark-e-salam kuchh bhi na thi

zikr hi se tere ujala tha

shama-e-bazm-e-kalam kuchh bhi na thi

aadmi ko nasha tha ruhani

pahle tauqir-e-jam kuchh bhi na thi

jaise sahra ki ho sada koi

qadr-e-arz-e-awam kuchh bhi na thi

dil-kusha dard ke siwa 'asrar'

wo judai ki sham kuchh bhi na thi