husn ki dil mein mere jalwa-gari rahti hai

husn kī dil meñ mire jalva-garī rahtī hai

band is shīsha-e-nāzuk meñ parī rahtī hai

dil vahāñ khultā hai jis jā ki rahe jām-e-sharāb

daana vaañ ugtā hai jis jā ki tarī rahtī hai

tiflī-o-ahd-e-javānī kā na pūchho ahvāl

be-ḳhudī aage thī ab be-ḳhabarī rahtī hai

bāġh-e-ālam meñ nahīñ dast-e-karam ko hai zavāl

shāḳh ye vo hai jo tā-hashr harī rahtī hai

yaad meñ jām-o-surāhī ke tire ai saaqī

dil bharā rahtā hai āñkhoñ meñ tarī rahtī hai

mai-o-māshūq se daulat se bahār-e-gul meñ

chakkhiyāñ rahtī haiñ yāroñ kī charī rahtī hai

har ghaḌī rahtā hai ḳhayāl-e-ruḳh-e-mahbūb kā dhyān

āj-kal sāmne kotah-nazarī rahtī hai

bhiiḌ sī bhiiḌ lagī rahtī hai kūche meñ tire

jins ulfat kī magar vahāñ pe kharī rahtī hai

naqd-e-dil lete ho har ek kā be-bos-o-kanār

aap ke dhyān meñ kyā muft-barī rahtī hai

haath pakḌā hai mirā dast-e-junūñ ne jab se

har ghaḌī madd-e-nazar jāma-darī rahtī hai

baal khole nahīñ phirtā hai agar vo saffāk

phir kaho kyuuñ mujhe āshufta-sarī rahtī hai

rind vaañ baste haiñ jis jā ho ḳhum-o-ḳhum-ḳhāna

sher vaañ rahte haiñ jis jā ki tarī rahtī hai

husn ki dil mein mere jalwa-gari rahti hai

band is shisha-e-nazuk mein pari rahti hai

dil wahan khulta hai jis ja ki rahe jam-e-sharab

dana wan ugta hai jis ja ki tari rahti hai

tifli-o-ahd-e-jawani ka na puchho ahwal

be-KHudi aage thi ab be-KHabari rahti hai

bagh-e-alam mein nahin dast-e-karam ko hai zawal

shaKH ye wo hai jo ta-hashr hari rahti hai

yaad mein jam-o-surahi ke tere ai saqi

dil bhara rahta hai aankhon mein tari rahti hai

mai-o-mashuq se daulat se bahaar-e-gul mein

chakkhiyan rahti hain yaron ki chari rahti hai

har ghaDi rahta hai KHayal-e-ruKH-e-mahbub ka dhyan

aaj-kal samne kotah-nazari rahti hai

bhiD si bhiD lagi rahti hai kuche mein tere

jins ulfat ki magar wahan pe khari rahti hai

naqd-e-dil lete ho har ek ka be-bos-o-kanar

aap ke dhyan mein kya muft-bari rahti hai

hath pakDa hai mera dast-e-junun ne jab se

har ghaDi madd-e-nazar jama-dari rahti hai

baal khole nahin phirta hai agar wo saffak

phir kaho kyun mujhe aashufta-sari rahti hai

rind wan baste hain jis ja ho KHum-o-KHum-KHana

sher wan rahte hain jis ja ki tari rahti hai