husn ki ek chingari ne kya KHub lagai ishq ki aag

husn kī ik chingārī ne kyā ḳhuub lagā.ī ishq kī aag

ruḳh par zulf kā jhoñkā aayā aur lahrā.ī ishq kī aag

aañkh se niklī ik dastak ne dil darvāza khol diyā

pyaar kā ik guldasta thāme milne aa.ī ishq kī aag

saath meñ jiinā saath meñ marnā rishta apnī sadiyoñ kā

ham-jolī ho apnī jaise yā māñ-jā.ī ishq kī aag

pair meñ chakkar haath meñ kaasa dil vāloñ kī bastī meñ

pyaar kī daulat lene nikle haath meñ aa.ī ishq kī aag

hijr ke tapte sahrā meñ ik yaad ke ghūñT se dam aayā

bilkul jaan nikalne ko thī jab pahuñchā.ī ishq kī aag

us zālim kī nazroñ meñ kuchh jaadū jaisī baat to thī

pahle pyaar kā ruup sajāyā phir sulgā.ī ishq kī aag

hijr ke hāthoñ dil kī zamīñ par nāg-phanī jab kāsht hue

ham ne yaad kī kaliyāñ sūñghīñ aur mahkā.ī ishq kī aag

duniyā bhar kī nahreñ dariyā aur samundar suukh ga.e

sohnī apne kachche ghaḌe meñ jab bhar laa.ī ishq kī aag

yuuñ to 'sabā' ham har mausam meñ aag meñ zinda jalte haiñ

sāvan kī rut ne lekin khul kar barsā.ī ishq kī aag

husn ki ek chingari ne kya KHub lagai ishq ki aag

ruKH par zulf ka jhonka aaya aur lahrai ishq ki aag

aankh se nikli ek dastak ne dil darwaza khol diya

pyar ka ek guldasta thame milne aai ishq ki aag

sath mein jina sath mein marna rishta apni sadiyon ka

ham-joli ho apni jaise ya man-jai ishq ki aag

pair mein chakkar hath mein kasa dil walon ki basti mein

pyar ki daulat lene nikle hath mein aai ishq ki aag

hijr ke tapte sahra mein ek yaad ke ghunT se dam aaya

bilkul jaan nikalne ko thi jab pahunchai ishq ki aag

us zalim ki nazron mein kuchh jadu jaisi baat to thi

pahle pyar ka rup sajaya phir sulgai ishq ki aag

hijr ke hathon dil ki zamin par nag-phani jab kasht hue

hum ne yaad ki kaliyan sunghin aur mahkai ishq ki aag

duniya bhar ki nahren dariya aur samundar sukh gae

sohni apne kachche ghaDe mein jab bhar lai ishq ki aag

yun to 'saba' hum har mausam mein aag mein zinda jalte hain

sawan ki rut ne lekin khul kar barsai ishq ki aag