husn o ulfat mein KHuda ne rabt paida kar diya

husn o ulfat meñ ḳhudā ne rabt paidā kar diyā

dard-e-dil mujh ko diyā tum ko masīhā kar diyā

ḳhuub kī taqsīm tū ne ai ḳhayāl-e-zulf-e-yār

dil ko nazr-e-dāġh sar ko vaqf-e-saudā kar diyā

jaan le lenā jalānā khel hai mā'shūq kā

aañkh se maarā lab-e-nāzuk se zinda kar diyā

mujh ko shikva hai ki dil kā ḳhuun qātil ne kiyā

dil ye kahtā hai mujhe qatre se dariyā kar diyā

naaz ho yā dilbarī afsūñ ho yā jādūgarī

sab ko qudrat ne tirī chitvan kā hissa kar diyā

dil idhar ruḳhsat huā hosh us taraf chalte hue

kis kī āñkhoñ ne ye dar-parda ishārā kar diyā

maiñ kahāñ chāhat kahāñ ye sab karishme dil ke haiñ

tum pe ḳhud shaidā huā mujh ko bhī shaidā kar diyā

marhabā ai sāqī-e-jādū-nazar sad-marhabā

mast āñkhoñ ne mirā nashsha do-bālā kar diyā

dil taḌaptā hai to kuchh taskīn hotī hai 'jalīl'

jī bahalne ko ḳhudā ne dard paidā kar diyā

husn o ulfat mein KHuda ne rabt paida kar diya

dard-e-dil mujh ko diya tum ko masiha kar diya

KHub ki taqsim tu ne ai KHayal-e-zulf-e-yar

dil ko nazr-e-dagh sar ko waqf-e-sauda kar diya

jaan le lena jalana khel hai ma'shuq ka

aankh se mara lab-e-nazuk se zinda kar diya

mujh ko shikwa hai ki dil ka KHun qatil ne kiya

dil ye kahta hai mujhe qatre se dariya kar diya

naz ho ya dilbari afsun ho ya jadugari

sab ko qudrat ne teri chitwan ka hissa kar diya

dil idhar ruKHsat hua hosh us taraf chalte hue

kis ki aankhon ne ye dar-parda ishaara kar diya

main kahan chahat kahan ye sab karishme dil ke hain

tum pe KHud shaida hua mujh ko bhi shaida kar diya

marhaba ai saqi-e-jadu-nazar sad-marhaba

mast aankhon ne mera nashsha do-baala kar diya

dil taDapta hai to kuchh taskin hoti hai 'jalil'

ji bahalne ko KHuda ne dard paida kar diya