husn walon ka sar-e-sahil nazara hai ki nain

husn vāloñ kā sar-e-sāhil nazāra hai ki na.iñ

Dūbne vaale ko tinke kā sahārā hai ki na.iñ

jab ki ham donoñ ne bāñg-e-dil pe āmannā kahā

haal hai ab jo hamārā vo tumhārā hai ki na.iñ

fā.ede se mujh ko zyāda fikr hai nuqsān kī

muḳhlisī ke kaam meñ koī ḳhasāra hai ki na.iñ

merī sehhat ho ga.ī behtar tumhāre ishq meñ

tum ko bhī kār-e-mohabbat ne sañvārā hai ki na.iñ

un ko dekhā dekhte hī ham shanāvar ho ga.e

bahr-e-ulfat kā ḳhudā jaane kināra hai ki na.iñ

ye jabīñ ruḳhsār āñkheñ lab hamāre haiñ magar

ye batāo dil tumhārā bhī hamārā hai ki na.iñ

husn walon ka sar-e-sahil nazara hai ki nain

Dubne wale ko tinke ka sahaara hai ki nain

jab ki hum donon ne bang-e-dil pe aamanna kaha

haal hai ab jo hamara wo tumhaara hai ki nain

faede se mujh ko zyaada fikr hai nuqsan ki

muKHlisi ke kaam mein koi KHasara hai ki nain

meri sehhat ho gai behtar tumhaare ishq mein

tum ko bhi kar-e-mohabbat ne sanwara hai ki nain

un ko dekha dekhte hi hum shanawar ho gae

bahr-e-ulfat ka KHuda jaane kinara hai ki nain

ye jabin ruKHsar aankhen lab hamare hain magar

ye batao dil tumhaara bhi hamara hai ki nain