hun main parwana magar shama to ho raat to ho

huuñ maiñ parvāna magar sham.a to ho raat to ho

jaan dene ko huuñ maujūd koī baat to ho

dil bhī hāzir sar-e-taslīm bhī ḳham ko maujūd

koī markaz ho koī qibla-e-hājāt to ho

dil to bechain hai iz.hār-e-irādat ke liye

kisī jānib se kuchh iz.hār-e-karāmāt to ho

dil-kushā bāda-e-sāfī kā kise zauq nahīñ

bātin-afroz koī pīr-e-ḳharābāt to ho

guftanī hai dil-e-pur-dard kā qissa lekin

kis se kahiye koī mustafsir-e-hālāt to ho

dāstān-e-ġham-e-dil kaun kahe kaun sune

bazm meñ mauqa-e-iz.hār-e-ḳhayālāt to ho

vaade bhī yaad dilāte haiñ gile bhī haiñ bahut

vo dikhā.ī bhī to deñ un se mulāqāt to ho

koī vaa.iz nahīñ fitrat se balāġhat meñ sivā

magar insān meñ kuchh fahm-e-ishārāt to ho

hun main parwana magar shama to ho raat to ho

jaan dene ko hun maujud koi baat to ho

dil bhi hazir sar-e-taslim bhi KHam ko maujud

koi markaz ho koi qibla-e-hajat to ho

dil to bechain hai izhaar-e-iradat ke liye

kisi jaanib se kuchh izhaar-e-karamat to ho

dil-kusha baada-e-safi ka kise zauq nahin

baatin-afroz koi pir-e-KHarabaat to ho

guftani hai dil-e-pur-dard ka qissa lekin

kis se kahiye koi mustafsir-e-haalat to ho

dastan-e-gham-e-dil kaun kahe kaun sune

bazm mein mauqa-e-izhaar-e-KHayalat to ho

wade bhi yaad dilate hain gile bhi hain bahut

wo dikhai bhi to den un se mulaqat to ho

koi waiz nahin fitrat se balaghat mein siwa

magar insan mein kuchh fahm-e-ishaaraat to ho